Mag-ingat sa abo ng Taal – DOH

NAGLABAS ng mga paalala ang Department of Health (DOH) sa mga residente na malapit sa Bulkang Taal sa mga panganib sa kalusugan na idudulot ng paglanghap ng nakalalasong ibinubuga ng nag-aalburutong bulkan.

“Ang sulfur oxide ay isang nakalalasong usok na maaaring makaapekto sa kalusugan ng tao at hayop, pati na rin ang mga halaman. Maaari kang ma-expose rito sa pamamagitan ng paglanghap ng hangin na may sulfur oxide o sa pamamagitan ng skin contact,” ayon sa DOH.

Partikular na pinaalalahanan ng DOH ang mga taong mahihina ang baga, may sakit na hika, may sakit sa respiratory na maaaring magdulot ng hirap sa paghinga.

Bukod dito, maaaring magdulot ang sulfur oxide ng pangangati ng bala, pangangati ng mata, mucus secretion, bronchitis, pag-uubo at hika.

“Ang matagal na pananatili o paglanghap ng mataas na konsentrasyon ng hanging ito ay maaaring magdulot ng pamamaga at iritasyon ng baga at mga daluyan ng hangin.

Pinayuhan ng kagawaran ang mga nakatira malapit sa bulkan na palagiang magsuot ng face mask na panlaban sa sulfur oxide hindi lang sa COVID-19, pagsasara ng mga pinto at bintana ng bahay, at huwag lumabas kung hindi naman kinakailangan.