Mag-live-in partner na tulak kulong sa P374K shabu sa Valenzuela

ISINELDA ang mag live-in partner na tulak ng illegal na droga at kapwa listed bilang high value individual (HVI) matapos makuhanan ng halos P.4 milyon halaga ng umano’y shabu sa buy bust operation sa Valenzuela City.

Kinilala ni Valenzuela police chief P/Col. Salvador Destura Jr, ang naarestong mga suspek bilang sina John Erwin Reyes, 24, at Michaela Sevilla alyas “Ella”, 19, kapwa ng 125 Dulong Tangke, Brgy. Malinta.

Ayon kay Col. Destura, dakong alas-6:30 ng umaga nang magsagawa ang mga operatiba ng Station Drug Enforcement Unit (SDEU) sa pangunguna ni PCPT Joel Madregalejo ng buy bust operation sa Dulong Tangke, Brgy. Malinta matapos ang natanggap na impormasyon hinggil sa pagbebenta umano ng iligal na droga ng mga suspek kung saan isang undercover police ang nagawang makipagtransaksyon sa kanila ng P1,000 halaga ng shabu.

Nang matanggap ang pre-arrange signal mula sa kanyang kasama na nagpanggap na poseur buyer na hudyat na nakabili na siya ng shabu sa mga suspek ay agad lumapit ang back-up na operatiba saka inaresto ang mag partner.

Ani PCpl Christopher Quiao, nakumpiska sa mga suspek ang humigi’t kumulang 55 grams ng hinihinalang shabu na may standard drug price P374,000, marked money, P600 seized money, dalawang cellphones, dalawang valid IDs at coin purse.

Pinuri ni Northern Police District (NPD) District Director PBGEN Ponce Rogelio Peñones Jr, ang Valenzuela CPS sa kanilang matagumpay na drug operation habang mahaharap naman ang mga suspek sa kasong pagpalabag RA 9165 o ang Comprehensive Dangerous Drug Act of 2002. (Richard Mesa)