May nag-leak kasi na photos from the venue: BEA, inamin na napilitang isapubliko kaagad ang engagement nila ni DOMINIC

NAIMBITAHAN ng GMA Network si Kapuso fashion and style icon Heart Evangelista na manood ng block screening ng “Five Breakups and A Romance” nina Alden Richards at Julia Montes, doon nakasama ni Heart na manood din si Alden. 

Nagkaroon ng chance si Alden na matanong si Heart kung kailan sila gagawa ng kanilang project together?  Nai-post ni Heart sa kanyang Instagram ang photos ng movie night nila ni Alden, na binati niya ang actor sa tagumpay ng movie nila ni Julia.

Kaya may mga fans na na-excite sa tanong na iyon ni Alden kay Heart, at nagtatanong na sila kailan nga sila magsasama sa isang project?

Ayon kay Heart, meron na raw siyang storyline at nasabi na niya iyon kay Alden, sabi naman nito, maganda raw ang content, pero pag-uusapan pa nila ni Heart formally.

Natanong naman si Heart kung nagustuhan niya ang movie, sagot niya: “I love it, kasi, yung mga artista ngayon, pwede nang magmura, pwede nang humawak ng yosi, so makatotohanan.

“Very liberating siya, feeling ko parang ang sarap na nagagawa na ito ngayon.”

Pero mas naka-focus daw si Heart sa fashion shows and events abroad kaya nami-miss din daw niya ang paggawa ng movie.

Kaya plano niyang gumawa kahit isang project at sana raw ay maayos nila at mag-match ang kani-kanilang schedule ni Alden.

***

NA-EXCITE ang Kapuso loveteam na sina Miguel Tanfelix at Ysabel Ortega, na kasama sila sa “Firefly” na entry ng GMA Pictures at GMA Public Affairs sa 2023 Metro Manila Film Festival sa December.

First time nila iyong makasama sa isang MMFF movie, at maka-join sa parade of stars sa December 17.  Dati raw ay nanonood lamang sila ng festival parade, pero ngayon ay sila naman ang papanoorin ng mga tao.

Ang “Firefly” ay nagtatampok kina Alessandra de Rossi at child star na si Euween, kasama  nila sina Cherry Pie Picache, Epy Quizon, Yayo Aguila, Max Collins at Kokoy de Santos.  May special participation si Kapuso Primetime King Dingdong Dantes.

Ang coming-of-age road trip drama ay tungkol sa isang batang lalaki na hahanapin ang mythical island na madalas na ikuwento sa kanya ng kanyang ina.

Ang movie ay dinirek ni Zig Dulay.

***

INIHAYAG ni Bea Alonzo nang mag-guest siya sa special birthday celebration ni Boy Abunda sa “Fast Talk with Boy Abunda,” na wala talaga silang plano ng kanyang fiancé na si Dominic Roque na isapubliko kaagad ang kanilang engagement.

Kaya lang kumalat na sa social media ang kanilang photos, kaya inanunsyo na rin nila ito.

“Sa totoo lang dapat hindi muna namin i-announce,  we wanted to savor it na kami muna, na kahit one month, na kami lamang ang nakakaalam, we wanted to keep it a secret na may kinakikiligan kami na kami lamang dalawa.

“But then may nag-leak kasi na photos from the venue.  Kaya we had to release the pictures, we had to announce right away.  Kasi parang unfair naman kung sa ibang tao manggagaling ang announcement, so inunahan na namin.”

Ikinatuwa naman ni Bea na maraming mga tao ang nakisama sa kanilang kasiyahan sa nangyaring engagement nang dumalo sila ni Dom sa GMA Gala.

(NORA V. CALDERON)