MM Mayors, pinayagan ang religious gatherings ng 30% capacity

SINABI ng Inter-Agency Taks Force (IATF) na pinapayagan ng Metro Manila Council ang religious gatherings sa 30% vanue capacity.

Nauna nang pinayagan ng IATF anag religious gatherings ng 10% ng venue capacity sa ilalim ng General Community Quarantine “with heightened restrictions.”

Sa kabilang dako, binigyan naman ng diskresyon ang Local Government Units (LGUs) na taasan ang venue capacity ng religious gatherings na hindi lalagpas sa 30% allowable venue capacity.

Sa kabilang dako, kinunsidera naman ng IATF ang 9th Meeting of the ASEAN Plus Three Emergency Rice Reserve of the National Food Authority bilang essential gathering at inaprubahan ang conduct nito.

Pinayagan din ang pagbabalik ng relocation activities ng Department of Public Works and Highways para sa mga apektadong informal settlers na may kaugnayan sa kanilang construction projects, alinsunod naman sa umiiral na batas at ordinansa “and subject to safety and health protocols and strict observance of minimum public health standards.”

Inaprubahan din ng IATF ang rekumendasyon ng National Economic and Development Authority na palawakin ang contact tracing applications ng iba’t ibang local government units, gaya ng ginamit sa Pasig, Mandaluyong, Antipolo, Valenzuela, at iba pa.

Kaugnay nito, inatasan naman ang Department of Information and Communication Technology at Department of the Interior and Local Government na magpalabas ng polisiya para tiyakin na ang lahat ng contact tracing applications ay “interoperable.”

Samantala, inaprubahan naman ang naging kahilingan ng Philippine Swimming Incorporated na mag- host ng 2021 Swimming National Selection Meet sa ilalim ng bubble-type format sa New Clark City Aquatics Center, Capas, Tarlac.

Kaugnay nito, ang delegado naman ng National Selection Meet ay ikukunsidera bilang Authorized Persons Outside of Residence at payagan sa interzonal travel.

Ang mga atleta naman na pupunta sa Tokyo Olympics at South East Asian Games ay maaari magsimula na ng kanilang bubble-type training, “subject to the applicable guidelines” ng Philippine Sports Commission, Games and Amusement Board at Department of Health.”

Kaugnay pa rin nito, inaprubahan ng IATF ang rekumendasyon ng Technical Working Group’s sa Interim National Immunization Technical Advisory Group (iNITAG) na iprayoridad ang pagbabakuna sa mga atleta, coaches, delegado at opisyal na magtutungo sa Tokyo Olympics at South East Asian Games.

Kasama rin sa babakunahan ay ang mga frontline employees ng business process outsourcing industry at frontline employees ng Commission on Elections na inirekumenda naman sa iNITAG na makasama sa Priority Group A4.

Samantala, ang liquefied petroleum gas dealers, retailers at attendants ay bahagi na rin ng inaprubahang Priority Group A4.2 para sa vaccine deployment sa ilalim ng “retail trade operators and frontliners.”

Isa namang Small Working Group ang nilikha para pag-aralan at bumalangkas ng protocols para sa inbound international travel ng “fully vaccinated individuals” kung saan ang Department of Tourism ang tatayong chairman habang ang Department of Foreign Affairs ang co-chairman. (Bishop Jesus “Jemba” M. Basco)