MM mayors wala pang rekomendasyon sa IATF

Wala pang nabubuong consensus ang mga alkalde sa Metro Manila kung kanila bang irerekomenda o hindi ang pagpapalawig nang modified enhanced community quarantine status (MECQ) sa National Capital Region (NCR).

Ayon kay Metro Manila Council (MMC) chairman Benhur Abalos Jr., maraming kinukonsidera sa kanilang magiging desisyon ang mga alkalde sa NCR kabilang na ang bilang ng mga available na ICU beds sa rehiyon pati na rin ang opinyon ng mga economic managers ng Duterte administration.

Sinabi naman ni Marikina City Mayor Marcelino Teodoro na hindi pa nila nakukuha ang data analytics pati na rin ang inputs ng private sector kaya hindi pa sila nakakabuo ng desisyon patungkol sa quarantine status sa NCR.

Bagama’t bumaba na ang mga naitatalang kaso sa NCR, nasa critical level p[a rin aniya ang dami ng COVID-19 cases kaya kailangan ding ipagpatuloy ang contact tracing.

Mahalaga ikonsidera ang mga ito lalo pa at may mga projection nang pagdami ng mga kaso sa oras na ibalik sa general community quarantine ang NCR, pati na rin ang scenario kapag ipagpapatuloy ng dalawa pang linggo ang MECQ.

Kaya mamayang alas-4:00 ng hapon ay magkakaroon ulit ng pulong ang Metro Manila mayors at maaring doon magkaroon ng recommendation na.

Magugunita na itinakda sa darating na Abril 30 ang pagtatapos ng MECQ sa NCR pati na rin sa apat na karatig probinsya. (Daris Jose)