Naninibago sa pagbabalik sa Instagram at Tiktok: TOM sa teatro muna sasalang sa pamamagitan ng ‘Ibarra: The Musical’

NAKATUTUWANG mapanood muli si Tom Rodriguez sa telebisyon matapos ang ‘pamamahinga’ nang halos dalawang taon.

Nagpainterbyu si Tom kay Nelson Canlas sa ‘Chika Minute’ at nagbahagi ng naging buhay niya sa Arizona sa USA.

“Two weeks lang dapat ako nandun,” lahad ni Tom, “nawili rin ako. Long story short, I really had to take time to really recover and now, I do feel na buo na ako ulit.

“Nawili din ako na when I started taking on responsibilities for myself, maintaining the household, learning to cook, learning to do the laundry, yung washing machine tsaka dryer doon, mag-grocery, couponing, all that stuff. Na-enjoy ko,” sinabi pa ng hunky Kapuso actor.

Sa pagbabalik ni Tom sa showbiz, mukhang sa teatro muna siya sasalang; isang concert version ng ‘Ibarra: The Musical’ ang sasabakan agad ni Tom.

“I’m glad na they offered me this role. I’ve been really yearning to be back into theater and napagbigyan uli.”

At dahil pansamantalang nag-deactivate ng kanyang social media, kahit naninibago ay sinubukang bumalik na muli si Tom sa Instagram at sa Tiktok.

“Medyo hindi pa ako sanay mag-social media uli. So I’ve been trying to force myself to go back.

“I’m on TikTok din, I’m starting to push myself out of my comfort zone kasi nakaka-spoil pala yung wala.

“It’s nice din to reconnect with the people. Kaya I’m trying to push myself to go out of my ermitanyo mode,” ang nakangiting wika pa ng mag gumuwapong si Tom.

Enero of this year bumalik sa Pilipinas si Tom matapos lumipad pa-Amerika noong 2022 matapos nilang maghiwalay ni Carla Abellana.

***

PINSAN ng Vivamax actor na si Anthony Davao si Rikki Mae Davao, ang anak nina Ricky Davao at Jackie Lou Blanco, na kailan lamang ay naisulat na namin ang tungkol sa pagiging out and proud lesbian nito.

Close sina Anthony at Rikki Mae noong mga bata pa sila pero ngayong malalaki na sila at pareho ng busy ay hindi na masyadong nagkikita.

“I’m close to ate Rikki Mae, we talk and we chat and nagkukumustahan but we don’t get together anymore kasi nag-pandemic and then now busy na rin pareho.”

Ano ang reaksyon ni Anythony sa pag-out ni Rikki Mae bilang miyembro ng LGBTQ community?

“At first I was shocked kasi hindi ko nakita, I didn’t see it coming!”

Noong mga bata raw sila at madalas magkakasama ay babaeng-babae si Rikki Mae.

“Then dumating sa point na may reunion kami, parang short hair na siya, doon parang na-feel ko na, ‘Baka si ate Rikki Mae, lesbian.’

“But wala naman akong, if that’s who you are, don’t be ashamed, wala namang nakakahiya doon, kung ikaw iyon, let it be,” ang nakangiting pahayag pa ni Anthony na gumaganap na Benjo sa ‘Room Service’ ng Vivamax.

Available for streaming sa Vivamax, lead female star sa ‘Room Service’ si Shiena Yu na gumaganap bilang si Carol, kasama si Anthony bilang Benjo at sina Angelo Ilagan bilang Michael at Nathan Cajucom bilang si Arvin, sa direksyon ni Bobby Bonifacio, Jr.

Pangatlong Vivamax film na ito ni Anthony ; bago ito ay ginawa niya ang mga pelikulang ‘Purificacion’ na sinundan ng ‘Tayuan’.

Nakagawa naman siya ng dalawang Vivamax series, ang ‘Lovely Ladies Dormitory’ at ‘An/Na’.

(ROMMEL L. GONZALES)