NORA, isa sa apat na artistang gagawaran ng ‘Gawad Dekada’; fans ni Cong. Vi nag-react dahil ‘di kasama ang kanilang idolo

APAT na artista lang ang gagawaran ng Gawad Dekada ng Manunuri ng Pelikulang Pilipino for the period 2010-2020.

Ito ay sina John Lloyd Cruz, Ms. Nora Aunor, Angeli Bayani, at Alessandra de Rossi.

Sila lang ang napili ng mga supladang kasapi ng Manunuri na deserving of the Gawad Dekada.

Sa column ni Manunuri member Tito Valiente ay binanggit niya na bagamat importante na ang aktor o aktres ay nagwagi o nagkamit ng nominasyon para mai-consider sa parangal, mas binigyan ng bigat ng Manunuri kung paano binuo ng aktor o aktres ang kanilang character on-screen, na sumalamin sa socio-political realities sa ating bansa.

Tinignan din ng critics’ group ang consistency sa performance at ang kalidad ng pelikula na ginawa ng aktor o aktres.

Kaya nagpupuyos sa galit ang ibang fans ni Cong. Vilma Santos dahil hindi kasali si Cong. Vi sa Gawad Dekada recipients.

They were trying to discredit Ate Guy na isang beses lang nagwagi kaya ‘di raw ito dapat bigyan ng parangal.

Nagwagi si Ate Guy for Thy Womb in 2013 pero for the succeeding years ay nominated naman siya kahit di siya winner.

She was nominated for her work in Ang Kuwento ni Mabuti (2014), Dementia (2015), Taklub (2016) at Hinulid (2017). Iyan ang tinatawag na consistency sa performance.

Kaya kung masama ang loob ng ibang fans ni Cong. Vi na walang Gawad Dekada ang kanilang idol ay sa dahilang wala naman pelikulang ginawa si Cong. Vi for the decade except Extra (for which she got an Urian nomination) and Everything About Her (which failed to meet Urian’s standard).

Gaganapin ang virtual awarding ng Gawad Urian ngayong Huwebes, October 21, at mapapanood ito ng live sa FB Page ng Manunuri.

***

PATULOY ang pamamayagpag ng GMA Network sa mga international award-giving bodies matapos nitong makakuha ng 1 World Medal at 5 Finalist Certificates sa prestihiyosong 2021 New York Festivals (NYF) “World’s Best TV and Films” Competition.

Nagkamit ang investigative program at eight-time NYF World Medalist na Reporters Notebook ng Bronze Medal para sa dokyu nitong “Mga Sugat ni Miguel” sa ilalim ng Documentary: Health/Medical Information category. Ika-siyam na World Medal na ito ng programang hosted nina Maki Pulido at Jun Veneracion.

GMA rin ang nanguna sa mga short-listed entry mula sa Pilipinas. Ang segment ng Kapuso Mo Jessica Soho (#KMJS) na “Babaeng Tinaga sa Mukha” nag-uwi ng finalist certificate sa Documentary: Social Justice category. Isa pang Public Affairs program, ang Reel Time, ang tumanggap ng finalist certificate para sa “This Abled” dokyu sa ilalim ng Documentary: Heroes category. Ang The Atom Araullo Specials ay may finalist certificate rin para sa episode nitong “The Atom Araullo Specials: Dreams of Gold” sa ilalim ng Program: Sports Documentary category.

Ipinagmamalaki ring mapabilang ng The Clash sa mga nag-uwi ng finalist certificate para sa Entertainment Program: Variety category. At ang first-ever virtual reality concert sa Pilipinas na Alden’s Reality: The Virtual Reality Concert ay nakakuha rin ng finalist certificate para sa TV airing nito sa ilalim ng Entertainment Special: Special Event category.

(RICKY CALDERON)