P59.8-B health emergency allowance, ipamamahagi sa mga medical frontline -PBBM

TINATAYANG P59.8 bilyong piso ang ipamamahagi sa medical frontline workers para sa kanilang health emergency allowance sa panahon ng COVID-19 pandemic.

Sa isang Facebook post, sinabi ni Pangulong Ferdinand Marcos na ang nasabing halaga ay 78.92% ng COVID-19 health emergency allowance na inilaan ng gobyerno sa mga health worker.

Sa naging pagdiriwang ng Health Workers’ Day, araw ng Martes, hindi naman lingid sa kaalaman ng Pangulo ang sakripisyo at serbisyo ng mga health worker.

”Mas pinahahalagahan natin ang sakripisyo ng ating mga frontliner na naglilingkod nang buong puso at nagpapakita sa mundo ng galing at malasakit ng Pinoy,” ayon sa Punong Ehekutibo.

Samantala, sa ulat sa nasabing araw, nagtipon ang mga Health worker mula sa iba’t ibang ospital sa Kalakhang Maynila at nagmartsa sa Mendiola, ang hirit ng mga ito ay starting salary na P33,000 para sa public at private health workers.

Hiniling din ng mga ito ang pagpapalabas ng benepisyo, job security sa kanilang hanay at mass hiring ng permanent health workers para idagdag sa lumalalang understaffing sa mga public hospital. (Daris Jose)