Pagbabakuna sa mga nasa A4 priority group list kasama ang media, kasado na sa Hunyo

SA DARATING na buwan ng Hunyo nakatakda ang pagbabakuna laban sa covid 19 sa mga nasa A4 category kung saan kasama ang media.

“Well, ang A4 po inaasahan natin as soon as vaccines are available, mga Hunyo magsisimula na tayo,” ayon kay Presidential Spokesperson Harry Roque.

Sa kasalukuyan ay nasa hanay pa ng mga senior citizen at mga may commorbidities ang nakasalang sa vaccination program ng gobyerno kung saan pasok sana si Sec. Roque.

Subalit sinabi ni Sec.Roque na hindi pa muna siya magpapabakuna dahil susulitin niya ang anti- bodies na mayroon siya.

Masasayang lang ani Roque ang bakuna habang mayroon pa siyang antibodies kaya’t hihintayin niya aniya ang kaunting panahon para siyay sumalang sa bakuna.

“Ako po, kakagaling ko lang sa COVID ‘no so marami pa po akong antibodies ngayon ‘no. Pero magpapasukat po ako ng antibodies at ang sabi naman nila mga 90 days po nitong antibodies natin.

So habang marami pa akong antibodies, masasayang lang iyong aking bakuna ‘no, so antayin ko muna po siguro ang kaunting panahon,” lahad nito. (Bishop Jesus “Jemba” M. Basco)