PAGBAWI SA PRODUKTONG NOODLES, INIIMBESTIGAHAN

NAGSASAGAWA ng imbestigasyon ang Food and Drug Administration (FDA) sa  ulat ng pagbawi o pag-recall sa isang produkto ng noodles .

Sa inilabas na FDA Advisory ni Officer in Charge Director General Dr.Oscar Gutierrez, Jr para sa mga konsyumer, sinabing  nakikipag-ugnayan na rin ang ahensya sa food business operator upang suriin ang kanilang compliance.

Ito ay nakaraang natanggap ang ulat hinggil sa kasalukuyang ‘recall’ ng mga batch ng produktong ‘Lucky Me! Instant Pancit Canton Noodles’ sa European countries at Taiwan dahil sa pagkakaroon o presensya ng ethylene  oxide sa nasabing produkto.

Sa Pilipinas , ang nasabing produkto na rehistrado sa FDA  ay manufactured locally ng Monde Nissing Philippines.

Ayon sa FDA, para sa kaalaman ng publiko, ang ethylene oxide ay processing aid na ginagamit para ma-disinfect  ang mga herbs at spices.

Upang masiguro na protektado ang kalusugan ng publiko, ang paggamit ng ethylene oxide para sa mga layunin ng sterilizing sa pagkain ay hindi pinapayagan sa European Union (EU).

Gayunman, maaaring may bakas pa mula sa mga sangkap o raw materials. Nagtakda ang EU ng maximum residue levels sa napakababang antas batay sa uri ng commodity, ayon pa sa abiso ng FDA. (Gene Adsuara)