Pangatlo na ito sa kanyang collection: JILLIAN, sinorpresa ng magulang sa regalong sports car na pang-taping niya

DAHIL sa sipag ni Jillian Ward sa trabaho, sinorpresa siya ng kanyang magulang sa regalo nilang brand new BMW M-Sport na magagamit niya sa kanyang tapings.

Sa Instagram Stories post ni Jillian noong Lunes, nai-share niya ang bagong sasakyan at ang pasasalamat niya sa kanyang magulang.

“Thank you Mama and Papa for my new taping car!”caption pa niya.

Nangongolekta nga si Jillian ng mga mamahaling sports cars. Noong 2021, nabili niya ang kanyang unang BMW car.

Last March naman ay isang Porsche sports car ang binili niya.

Bilang si Analyn, ang gifted child na naging isang young neurosurgeon sa Abot Kamay Na Pangarap, mas dinoble pa ni Jillian ang kanyang focus sa pagiging isang aktres dahil sobra raw siyang na-challenge.

“Nakakakaba po talaga dahil very challenging yung role. Kailangan ko rin po i-memorize ang maraming medical or technical terms.

“Mabilis po yung mga eksena kaya dapat tama yung pag-pronounce ko ng medical terms tapos kailangan sabayan mo ng tamang emotions at di ka mawala sa blocking.”

***

SUMALI sa 7th Pacifico Local Surfing Competition sa Siargao ang aktres at vlogger na si Andi Eigenmann.

Sa Instagram Story ni Andi, makikita ang photo niya na kuha ng Pabst Camingue Photography kunsaan may bitbit siyang surfboard.

Binalita rin ni Andi na nakapasok na siya sa second round na naturang competition at nagpasalamat siya sa kanyang fiancé, ang surfing champion na si Philmar Alipayo.

“Sooo happy! Thanks mahal,” caption pa niya.

Natupad na raw ang “surfing dreams” ni Andi sa pagsali niya sa naturang competition. Noong magsimula raw siyang mag-aral ng surfing, akala niya ay late na siya para matuto. Pero sa mga nagdaang taon, pagaling lang siya nang pagaling.

Sey pa niya: “Because it made me happy, and it made me feel ME.”

Kakabalik lang mula sa isang buwang bakasyon nila Andi at ng kanyang pamilya sa Europe.

***

MARAMING subscribers ng YouTube channel ni Herlene “Hipon Girl” Budol ang hindi alam kung matatawa o maaawa ba sila sa natamong aksidente nito kamakailan.

Naganap ang aksidente habang nagbabakasyon sa isang mamahaling resort sa Batangas si Hipon kasama ang kanyang pamilya.

Sa naturang vlog, pinakita ng 2022 Binibining Pilipinas first runner-up ang kagandahang resort at ang bonding niya sa kanyang pamilya. Pinakita rin niya ang suot niyang bathing suit at ang ilang swimming pools at villas.

Noong nililibot na ni Hipon ang iba’t ibang kuwarto at pababa na siya sa first floor para subukan ang jacuzzi, bigla itong nadulas sa hagdan at mapahiyaw siya sa sakit ng paghulog niya. Mabilis naman na binigyan ng paunang lunas si Hipon sa mga natamo siyang gasgas sa braso.

Nagpatawa pa si Hipon na ang aksidente raw niya ay bunga ng katangahan.

In-assure naman ni Hipon sa mga ka-Squamy na okey siya at hindi siya nabalian ng anumang buto sa katawan. Hindi nga naman puwedeng mangyari iyon dahil magsisimula na ulit sa kanyang training si Hipon sa pag-compete niya sa 2022 Miss Planet International sa Uganda, East Africa.

(RUEL J. MENDOZA)