PBBM, nasa Thailand para lumahok sa APEC

ILANG  araw lamang matapos bumalik sa bansa, bumiyahe na  si Pangulong Ferdinand Marcos Jr. para lumahok sa ika-29 Asia-Pacific Economic Cooperation (APEC) Economic Leaders’ Meeting (AELM) sa Thailand.

Sa kanyang departure statement sa Villamor Air Base, nangako si Marcos na dadalhin niya ang pag-asa at adhikain ng bansa para sa isang mapayapa at maunlad na rehiyon ng Asia-Pacific.

Sinabi ng Pangulo na layunin niyang i-unlock ang economic potential, i-digitalize ang partisipasyon ng bansa sa digital economy, at sustainable development, gayundin ang pagtugon sa climate change crisis, at iba pa.

“Ang dala natin sa ganitong mga summit at mga meeting [ay] ang ating mga pangarap,” ani Marcos.

Inaasahang makikipagkita ang Pangulo at Unang Ginang Louise Araneta-Marcos kay King Maha Vajiralongkorn Phra Vajiraklaochaoyuhua at Queen Suthida Bajrasudhabimalalakshana.

Makikipagpulong din si Marcos sa mga pinuno ng negosyanteng Thai sa sideline ng APEC upang imbitahan sila na mamuhunan sa bansa at talakayin ang agenda sa ekonomiya ng administrasyon.

Makikipagpulong din ang Pangulo sa Filipino community sa Thailand.

Sinabi rin ni Marcos na ang APEC ay nananatiling isa sa mga pangunahing “platforms” ng Pilipinas sa pakikipag-ugnayan sa mga ekonomiya sa rehiyon ng Asia-Pacific.

Bago ang biyahe sa Thailand, dumalo si Marcos sa ASEAN Summits at Related Summits sa Cambodia  mula Nobyembe 10 hanggang 13.

Makikipag-ugnayan ang Pangulo sa iba pang mga lider kung paano haharapin ang food and energy security at ang economic inclusion ng micro, small, and medium enterprises (MSMEs) ng bansa. (Daris Jose)