PDU30, kinastigo si Gordon nang tawagin siyang “cheap politician”

KINASTIGO ni Pangulong Rodrigo Roa Duterte si Senador Richard Gordon matapos siyang tawagin nitong “cheap politician” sa gitna ng patuloy na pagdepensa ng Chief Executive sa emergency purchases na may kinalaman sa COVID-19 pandemic.

Sa kanyang Talk to the People, inulit ng Pangulo ang kanyang akusasyon laban kay Gordon na ginagamit ang Philippine Red Cross (PRC) bilang kanyang “milking cow” habang nagseserbisyo sa pamahalaan.

Si Gordon ay chairperson ng premier humanitarian organization sa bansa.

“Sabihin mo ‘cheap.’ Well, ako naman sinasabi ko you are a person who milked the government and the Red Cross both, because you sign for the Red Cross, you sign for the government,” ayon sa Pangulo.

Sinabi pa ng Pangulo na ang mukha ni Gordon ay nakadikit sa lahat ng ambulansiya ng PRC.

“Actually it’s a cheap political gimmick,” ani Pangulong Duterte.

“And I’m wondering why ako na ngayon ang naging cheap politician na itong isang bright boy sa Olongapo, iyong mukha niya, iyong mga ambulansya niya, nandiyan ‘yung mukha niya. Hindi naman siya pangit. Medyo tisoy nga,” dagdag na pahayag nito.

Kamakailan, tinawagan ng pansin ni Gordon si Pangulong Duterte para sa pagtatnggol nito sa mga indibiduwal na sangkot sa di umano’y overpriced medical supplies na binili ng pamahalaan noong nakaraang taon.

Ang kontrobersiyang ito ay tinitingnan na ng Senate blue ribbon committee na pinamumunuan ni Gordon.

Inilarawan din ng senador si Pangulong Dutrete bilang “bully”.

“Bakit kita takutin? Totoo ba hinahamon mo ako ng suntukan? Susmaryosep. Hindi ka nga siguro makaikot ng one round. You are getting to be preposterous,” ani Pangulong Duterte. (Daris Jose)