PDu30, pinasisigurong kasama ang pamilya ng mga pulis at sundalo na nakatakdang tumanggap ng bakuna

PINASISIGURO ni Pangulong Rodrigo Roa Duterte kay vaccine czar Carlito Galvez Jr na pati pamilya ng mga pulis at militar ay makikinabang sa nakatakdang pagbabakuna para sa mga nasa A4 category.

Sinabi ng Pangulo na dapat lang na mabigyan din ng kaparehong prayoridad ang pamilya ng mga kawal at miyembro ng PNP na noon pa man ay kanya ng inaasahan at may mahalaga naman talagang papel lalo na sa panahon ng kaguluhan.

Aniya, mahirap naman na sasabak sa aksiyon ang militar at pulis ng walang proteksiyon o bakuna.

Sa kabilang dako, sinabi naman ni vaccine czar Carlito Galvez Jr. na sinisimulan ng ayusin ang military at police camps upang magsilbi na ring vaccination sites sa oras na magsimula ng magturok ng bakuna sa mga hanay ng nasa A4 category.

Aniya, nasa 12 milyon din ang makakabilang sa naturang category na dito ay kasama nga ang mga sundalo at pulis gayundin ang mga nagtatrabaho sa gobyerno at kagawad ng media.

“Iyong unang guidance nyo po sa amin na gamitin ang mga kampo na vaccination site, gagawin po natin ‘yan pagka nagsimula na po tayo sa A4 kasi 12 million po ‘yong ating ano, ating important ano ‘to, ito ‘yong mga malalakas po na tao. Ito po ‘yong magda-drive ng ating economy at the same time, ito po ‘yong mag — mag-ano, magpo-protect ng institution, ng government institution kasi kung hindi po natin sila poprotektahan, hindi po mafu-full ang services po natin sa ating mga mamamayan. So equally important po natin po ‘yon,” anito.

Sinabi ni Galvez na malalaki ang area ng mga kampo maging dito sa Metro Manila gaya ng Army base, Navy base maging ng PNP at AFP na aniya’y malawak ang Grandstand.

“So ang gagawin po sir natin sir ay io-organize po natin ang lahat ng mga kampo at saka ‘yong mga tinatawag na bases ng mga pulis at saka po ng mga military na gagawin po nating bakunahan ng mga ano po, ng ating mga government frontliners,” ayon kay Galvez.

“And including po ‘yong mga major — major camps dito sa Metro Manila, puwede rin po nilang tulungan ang Quezon City, puwede rin po nilang tulungan ang — ang Parañaque dahil kasi po ‘yong Army base, Navy base, ‘yong PNP base at saka po ‘yong AFP base maganda po ‘yong kanilang mga grandstand at saka ‘yong kanilang mga open field. Puwede nating gamitin po ‘yon kasi ang laki po ng mga area ng ating mga kampo,” dagdag na pahayag nito. (Daris Jose)