Pinoy sugatan, 7 pa nawawala sa Hamas attack sa Israel

ISANG Pinoy ang kumpirmadong sugatan habang pito pa ang nawawala, kasunod nang naganap na pag-atake ng Palestinian terrorist group na Hamas sa Israel nitong Sabado.

Sa Bagong Pilipinas Ngayon public briefing, kinilala ni Overseas Workers Welfare Admi­nistration (OWWA) Deputy Administrator Arnell Ignacio ang nasugatan na si Joey Pasulingan na tinamaan ng bala.

Isang Pinoy naman ang nahirapan huminga o na-suffocate matapos sunugin ng mga terorista ang bahay nito at kanyang employer.

Inilabas din ni Ignacio ang pangalan ng ilan sa mga Pinoy na unaccounted for o nawawala pa rin sa Israel na sina Grace Cabrera; Shelly Morillo; Norilyn Babadilla; Gallenor Leandro Pacheco at Loreta Alacre.

Dalawa aniya sa mga ito ang magkasamang nagtatrabaho sa isang farm habang ang tatlo pa ay sa hiwa-hiwalay na lugar naman nagtatrabaho.

Habang natagpuan na sina Loreta de Costa; Buena Besol; at Marilyn Magana.

Ayon kay Department of Migrant Workers (DMW) officer-in-charge Hans Leo Cacdac, nasa maayos na kondisyon ang naturang Pinoy na nadaplisan umano ng bala sa braso at nilalapatan na ng lunas sa pagamutan.

Paglilinaw naman ni Cacdac na hindi nila iniisip na napahamak ang mga nawawala at sa halip ay maaari aniyang nasa isang safe room o ligtas na tahanan na malapit sa kanilang pinagtatrabahuhan at hindi sa lugar kung saan sila unang nairehistro.

Hindi naman inaalis ni Israel Consul General at Deputy Chief of Mission Anthony Mandap ang posibilidad na marami pang Pinoy ang nasugatan sa pagsalakay ng Hamas habang wala pang iniulat na nasawi sa tinatayang 30,000 Pinoy sa nasabing bansa.

Patuloy pa rin umanong inaalam ng mga otoridad ang ulat na may mga Pinoy na kabilang sa hinostage ng teroristang Hamas.

Kasabay nito, sinabi ni (DFA) Undersecretary for Migrant Workers Affairs Eduardo de Vega na patuloy nilang inaalam ang ibinahagi ng Israel-based OFWs na walong Filipino ang nawawala.

Ayon kay De Vega, may posibilidad na ang mga nawawalang Pinoy ay hindi lang makontak dahil naiwan o nawala ang kanilang mga telepono dahil sa pagmamadali sa pag-evacuate ng biglang umatake ang Hamas.

Nilinaw naman ni Mandap na wala pang plano kung ililikas ang mga Filipino sa Israel dahil sa ngayon ay nanatili pa sila sa kanilang mga bahay at bomb shelters.

Muli naman nagbukas ng operasyon ang Philippine embassy sa Tel Aviv nitong Lunes at pinayuhan ang sinumang Filipino na may pangangailangan na tumawag sa +972-54-4661188 / +972-50-911-4017. (Daris Jose)