Proklamasyon ng nanalong senador, partylists posible sa susunod na linggo

TARGET ng Commission on Elections (Comelec) na maiproklama na sa susunod na linggo ang mga nagwaging kandidato sa pagka-senador at mga party-list groups.

“Ang optimistic projection namin ay is in a week’s time. Tignan niyo ‘yung bar natin, it’s 82 out of 173, we will canvass the ­remaining COCs. Meron lang po tayong onti na hihintayin,” ayon kay acting Comelec spokesperson John Rex Laudiangco.

Sinabi niya na hindi lahat ng COCs (certificate of canvass) mula sa ‘overseas absentee voting’ ay ipadadala ng “electronically” dahil sa ang ilan ay ide-deliber ng pisikal sa National Board of Canvassers (NBOC).

Kailangan ding bilangin ang COCs mula sa ‘local absentee voting’ at ang mga galing sa 63 barangay sa North Cotabato na nagsagawa ng ‘manual voting’.

Para naman sa party-list groups, ipinaliwanag ni Laudiangco na sa formula sa ilalim ng RA 7941 o ang Party-List Act, kailangan na makakuha ng 2% -pataas ng kabuuang boto para sa party-list election para magkaroon ng isa hanggang tatlong puwesto sa Kongreso.

Pero maaari pang makakuha ng puwesto ang mga party-list na hindi makakaabot sa ‘threshold’ na ito. Ayon kasi sa batas, kailangan na bubuuin ang Kongreso ng 20% mula sa Party-list representatives kaya ibibigay ang puwesto sa mga may pinakamataas na bahagdan ng boto kahit hindi umabot sa 2%.

Lilimitahan naman ng Comelec ang mga kasama ng mga mananalong senador at party-list representatives sa kanilang proklamasyon base sa ipinatutupad na ‘minimum health protocols’. (Daris Jose)