Romualdez, pormal nang hinirang bilang Speaker ng House of Representatives

PORMAL nang hinirang bilang Speaker of the House of Representatives (HOR) si Leyte Representative Martin Romualdez ngayon sa unang araw ng 19th Congress.

Ito ay matapos siyang i-nominate ng kanyang pamangkin at presidential son na si Ilocos Norte Representative Ferdinand Alexander “Sandro” Marcos kasabay ng pagsambit nito sa mga kwalipikasyon ni Romualdez bilang isang pinuno na mag-aakay aniya sa lahat patungo sa mas mataas na antas.

Bagay na sinang-ayunan naman ni Batangas Representative Ralph Recto dahil sa mayaman na raw sa karanasan sa loob at labas ng pamahalaan si Romualdez matapos itong maglingkod sa House sa loob ng limang taon bilang majority leader at independent fiscalizer.

Batay sa resulta nang naging eleksyon para sa susunod na manunungkulang speaker of the House, lumabas na umabot sa 282 na mga miyembro sa House ang bumoto kay Romualdez habang nasa apat naman ang nag-abstain, at 22 ang hindi bumoto.

Samantala, ang mga indibidwal na hindi bumoto sa halalan para sa susunod na speaker of the House ay kinakailangang bumuo ng Minority bloc at maghahalal din sila ng kanilang pinuno, alinsunod yan sa mga alituntunin ng Kamara na pinagtibay naman ng Korte Suprema. (Daris Jose)