‘Tiny bubbles’ policy sa MECQ mananatili

Mananatili  pa rin ang small bubbles o tiny bubbles policy kung saan hindi pa rin papayagan ang mga indibidwal na makapamili ng mga basic goods sa labas ng kanilang mga siyudad o municipalties.

Ang paalala ay ginawa ni PNP Chief Gen. Guil­lermo  Eleazar para sa publiko partikular sa mga residente sa National Capital Region (NCR) at iba pang mga lugar na nasa Modified Enhanced Community Quarantine (MECQ).

Ayon kay Eleazar,  mananatili ang mga checkpoints sa mga borders at tanging mga Authorized Persons Outside Residence (APOR) ang maaaring makadaan sa mga Quarantine Control Points (QCPs).

Aniya, walang pagbabago sa kanilang mga checkpoints nuong nasa panahon ng ECQ ang Metro Manila.

Bagama’t hindi pinapayagan ang cross-border sa pamimili ng pangunahing bilihin, nilinaw naman ni Eleazar na pinapayagan naman tumawid sa ibang siyudad o cross-borders ang mga mayroong medical appointments at emergency services sa mga ospital.

Ayon naman kay JTF Covid Shield Comman­der Lt. Gen. Israel Ephraim Dickson, walang naitalang mga untoward incidents sa mga checkpoints.

Mahigpit pa rin ang paa­lala nito sa mga kapulisan na nagmamando ng QCPs na pairalin pa rin ang maximum tolerance.