Travel restriction sa Chinese travelers, ipatupad na

NANANAWAGAN  ang isang health expert na magpatupad na ng mas mahigpit na travel restriction ang gobyerno sa mga biyahero na mula sa China para makatiyak na hindi kakalat sa Pilipinas ang panibagong wave ng impeksyon ng COVID-19.

“We need to ask the Chinese visitors to submit RT-PCR test 48 hours prior to the flight and of course, test them upon arrival,” payo ni Dr. Tony Leachon sa Inter-Agency Task Force on COVID-19.

“If they are to be positive, they will be quarantined for about 7 days.”

Dapat umanong gayahin na ng Pilipinas ang ipinatutupad ng ibang bansa na restriksyon dahil sa patuloy na kakulangan sa datos at transparency ng virus sa China. Aminado rin ang Beijing na imposible na nilang makalkula ang lala ng outbreak nang tapusin nila ang mandatoryong “mass testing” noong nakaraang buwan.

Ikinatwiran ni Leachon na bagaman maayos ang kundisyon ng Pilipinas, maaaring mabaligtad ito sakaling kumalat ang mga bagong subvariants na nananalasa sa China lalo na at bumababa na ang immunity ng mga Pilipino at mababa ang nagpapabakuna ng booster shots sa ngayon.

Una nang iginiit ng Department of Health (DOH) na epektibo pa rin ang ipinatutupad na health protocols ng bansa sa anumang uri ng COVID-19 variants.

Pero para kay Leachon, kailangan nang baguhin ng gobyerno ang COVID-19 protocols patunay ng pananaw ng mga eksperto sa mundo na maaaring magkaroon ng bagong COVID-19 surge sa susunod na tatlong buwan.

Dapat umanong ibalik ang mandatoryong pagsusuot ng face mask, at madaliin na ang pagbili ng mga bagong “bivalent vaccines” at dagdag na mga antiviral na gamot.