Wala nang walk-in sa educational ayuda – DSWD

WALA nang mangyayaring walk-ins sa gagawing pamamahagi ng Department of Social Welfare and Development (DSWD) ng educational assistance sa mahihirap na mag-aaral sa bansa lalo na sa Metro Manila.

Nagpayo si DSWD Sec­retary Erwin Tulfo  na sa mga nais maka­ku­ha ng cash assistance ay kailangang mag-register sa https://bit.ly/3dB9mSg o mag-email sa ciu.co@dswd.gov.ph.

Ang aplikante anya ay maaaring tingnan ang DSWD website at social media accounts para sa mga katanungan at ibang mga detalye para dito.

Malaki ang paniwala ni Tulfo na ang mga kalituhan sa nagdaang sistema ng payout ang nagbukas sa kanilang gamitin ang digital system sa pamamahagi ng ayuda.

Ang mga aplikan­te ay tatanggap ng  text message mula sa  DSWD para malaman kung saan ang ka­nilang  payout sites.

“Pipiliin namin alphabetical, siguro this ?coming Saturday ‘yung mga apelyido na nagsisimula sa letrang A hanggang F so ‘yun muna ang ia-accommodate natin for this ?coming Saturday, nationwide ‘yun,” paliwanag pa ni Tulfo.

Makaraang suspendihin muna ang pamamahagi ng cash aid sa mga mag-aaral noong nagdaang Sabado dahil sa dumagsang mga tao, muling magsisimulang mamahagi ng ayuda ang DSWD para dito sa darating na Sabado.

Kaugnay nito, lumagda ng isang memorandum of agreement si Tulfo at DILG Secretary Benhur Abalos para magtulungan sa pamamahagi ng educational assistance sa mga mag-aaral.

Sa ilalim ng kasunduan, ang mga local go­vernment units (LGUs) ang magsasabi ng payout site at maglalagay ng dagdag na tauhan tulad ng mga social workers na susuri sa mga dokumento ng mga aplikante at maglalagay ng police at barangay officers sa lugar para sa maayos at matahimik na pamamahagi ng cash aid.

Tanging certificate of enrollment at identification card ang dadal­hin ng benepisyar­yong mag-aaral para makausap ng tauhan ng DSWD at matanggap ng mga ito ang kanilang financial assistance. (Daris Jose)