11 TULAK, NAARESTO SA DALAWANG DRUG DEN, P206,638K NASAMSAM

TINATAYANG mahigit sa P200K halaga ng hinihinalang shabu ang nasamsam at pagkakaaresto ng labing-isa  na hinihinalang tulak sa magkasunod na buy-bust operation at pagkalansag sa dalawang drug den sa Bacoor City, Cavite.

Kinilala ang mga suspek na si Maila Vasquez y Pagtakhan ( co-maintainer ng drug den)28; Jonathan Francisco y Ecle, 27;  Ariel Madrelejos y Batalia, 43;  Ismael Sanman, 38; Ramil Malinao y Paglinawan, 19;  Rommel Depano y Anbrad,  45; Jayson Lopez y Montanez (subject of Oplan Puting Bato) 31;  Ruel Bertudez y Abliter, 39;  Jeffrey Supil Matarong,  34;  Alejandro Estrada y Maninang, 24; Denver Paquingan y Velez, 31; habang pinaghahanap naman ang target ng buy bust na si alyas Bato na nakatakas.

Sa ulat, dakong alas-12:00 kamakalawa ng tanghali nang nagsagawa ng buy bust operation ng pinagsamang pwersa ng PDEA 4A, Cavite PDEU at Bacoor City Police Station kung saan target si Alias Bato sa Silangan St., Brgy Talaba 7, Bacoor City kung saan nakatakas ang huli subalit naaresto naman ang mismong maintainer ng drug den na si Vasquez at mga kasamahan nito na sina Lopez (subject ng Oplan Puting Bato), Bertudez, Matarong, Estrada at Paquingan at nasamsam ang 15 gramo ng hinihinalang shabu na may street value na P103,500 at iba’t  ibang drug paraphernalias.

Nakalipas lamang ng ilang minuto, isa pang buy bust operation ang isinagawa sa nasabi ring lugar (Silangan St., Brgy Talaba 7) dakong alas-12:10 kamakalawa ng hapon  na nagresulta sa pagkakaaresto nina Francisco, Madrelejos, Sanman, Malinao at Depano at pagkalansag ng isa pang drug den sa lugar at narekober ang 20 gramo ng hinihinalang shabu na may street value na P103,138 at mga drug paraphernalias.

Sa dalawang magkasunod na buy bust operation, umabot sa 35 gramo ang nasamsam na may street value na P206,638.00.  (GENE ADSUARA)