19 bangkay sa bumagsak na C-130 plane sa Sulu, nakilala na ng AFP

Natukoy na ng Armed Forces of the Philippines (AFP) ang pagkakakilanlan ng 19 sa 49 na sundalong nasawi sa pagbagsak ng C-130 cargo plane noong Linggo sa Patikul, Sulu.

Kabilang dito sina Major Emmanuel Makalintal, Major Michael Vincent Benolerao, First Lieutenant Joseph Hintay, Technical Sergeant Mark Anthony Agana, Technical Sergeant Donald Badoy, Staff Sergeant Jan Neil Macapaz, Staff Sergeant Michael Bulalaque, at Sergeant Jack Navarro mula sa Philippine Air Force.

Gayundin sina Captain Higello Emeterio mula sa AFP Medical Corps at First Lieutenant Sheena Alexandria Tato mula sa AFP Nurse Corps.

Nasawi rin sina Sergeant Butch Maestro, Private First Class Christopher Rollon, Private First Class Felixzalday Provido, Privates Raymar Carmona, Vic Monera, Mark Nash Lumanta, Jomar Gabas, Marcelino Alquisar, at Mel Mark Angana mula sa Philippine Army.

Nadala na rin ang labi ng 11 sundalo sa kani-kanilang bayan.

Habang ang labi ni First Lieutenant Tato ay ibinabiyahe na sa pamamagitan ng C295 aircraft at ang pito pang iba ay inihahanda para sa air at land transport.

Samantala, ayon naman kay AFP chief of staff General Cirilito Sobejana na patuloy pa sa pagtukoy ang militar para sa 30 bangkay na narekober sa crash site at kasalukuyang nasa Zamboanga City.

Nilinaw naman ni Sobejana ang bilang ng nasawi mula sa 50 ay nananatili ito sa 49 dahil nadoble lamang ang naunang pagbilang. (Daris Jose)