61 simbahan sa Maynila, tututukan ng MPD sa Simbang Gabi

TINIYAK  ni Manila Police District (MPD) Director P/Brig. General Andre Dizon na sapat ang itatalagang mga uniformed at civilian clothes personnel na magbabantay sa 61 simbahan sa Maynila para sa Simbang Gabi.

Sinabi ni Dizon,  na simula sa Dec. 16, asahan na magi­ging maayos at sapat ang kapulisan na itinalaga sa Quiapo Church,  Sto. Nino Church, San Sebastian Church, Manila Cathedral, San Agustin Church, at iba pang simbahan sa lungsod.

Kadalasang naoobserbahan sa panahon ng Simbang Gabi ang mga insidente ng  rambulan o frat war ng mga kabataan, holdapan at pandurukot.

Samantala, inihayag ni Dizon na hindi na ipatutupad pa ang pagbubusal ng mga baril ng mga tauhan ng MPD at umaasa siya na dapat pagkatiwalaan ang kaniyang mga tauhan na hindi magpaputok ng walang kabuluhan o indiscriminate firing sa panahon ng Kapaskuhan.

Paliwanag niya, sapat nang isipin at magsisilbing leksyon sa kapulisan na kung ano ang mawawala sa kanila kung gagawa pa ng katulad ng mga nadismis na miyembro ng PNP dahil lamang sa indiscriminate firing. (Daris Jose)