Colorum na mga vans ginagamit sa “human trafficking”

Iniibestigahan ngayon ng National Bureau of Investigation (NBI) ang nahuling operasyon ng mga vans na ginagamit sa “human trafficking” mula at papunta sa National Capital Region (NCR) Plus Bubble.

Ang mga nakasakay ng mga pasahero ay napagalaman na hindi sumailalim sa testing ng COVID 19. Ang nasabing operasyon ng mga colorum na vans ay nahuli ngayon mayron hard lockdown.

Sa isang video na lumabas sa social media ay makikitang ang mga pasahero ay bumaba sa isang cargo truck at pagkatapos ay sumakay sa commuter vans na magdadala sa mga pasahero sa Metro Manila.

Ang nasabing insidente ay nangyari sa pagitan ng Ragay, Camarines Sur at Tagkawayan sa Quezon province.

“Those closed vans and trucks smuggle people not tested for the virus in and out of Metro Manila. The booking of these illegal trips was done on social media. Some passengers in the video were not wearing face masks,” wika ni Department of Transportation (DOTr) Secretary Arthur Tugade.

Pinatawag ng Land Transportation Office (LTO) ang mga mayari at driver ng truck at mga vans dahil sa paglabag sa colorum operations at quarantine protocols.

Hinuli rin ng LTO ang may 12 colorum na sasakyan na papuntang Bicol region noong nakaraang Semana Santa kung saan ang 79 na pasahero nito ay nakitang positibo sa COVID 19.

Mula naman sa datus ng I-ACT, may nahuli na silang 153 na colorum mula noong January hanggang March 2021 sa Greater Metro Manila.

Upang mapigilan ang illegal na gawain, ang LTO-NCR ay patuloy na sinusubaybayan ang mga terminals sa Pasay at sa Cubao habang ang LTO Region V ay nanatiling nakabantay sa border ng Bicol.

Nangako naman si Highway Patrol Group Chief Brig Gen. Alexander Tagum na paiigtingin pa nila an kanilang operasyon laban sa mga colorum na sasakyan matapos na mahuli ang illegal na pagsasakay ng mga pasahero papunta at galing sa NCR Plus Bubble.

Tinawagan din ni Tugade ang mga ahensiya ng pamahalaan tulad ng Land Transportation Franchising and Regulatory Board (LTFRB), LTO, DOTr, I-ACT, PNP-Highway Patrol Group, at mga LGUs na magtulong-tulong sa pagsugpo ng human trafficking. (LASACMAR)