P19B pondo ng NTF-ELCAC, hindi ginamit sa campaign propaganda-Badoy

IGINIT ng National Task Force to End Local Communist Armed Conflict (NTF-ELCAC) na hindi ginamit sa campaign propaganda ang P19-bilyong kabuuang budget nito.

Binigyang diin ni Presidential Communications Operations Office (PCOO) Undersecretary Lorraine Marie Badoy, isa ring tagapagsalita ng NTF-ELCAC na ginamit ang nasabing pondo sa pagpapa-unlad ng mahigit sa 800 barangays na “cleared of insurgency.”

May alegasyon kasi si Bayan Muna Representative at House Deputy Minority Leader Carlos Zarate na ginagamit ng task force ang pondo nito sa pagtatayo ng mga tarpaulins at iba pang campaign propaganda para sa pinapaboran nilang mga kandidato.

“It’s a very clear no. None of that is going to campaign. Who’s campaigning? There’s no campaigning going on. It all goes to the Filipino people who need it the most,” diing pahayag ni Badoy.

Sa P19 bilyong kabuuang budget ng NTF-ELCAC, P16.5 bilyon ay inilaan para sa pagpapa-unlad ng 800 barangays na “cleared of insurgency.”

Sa katunayan, ang Barangay Development Program’s (BDP) core programs at mga proyekto para sa bawat recipient barangay, ay makatatanggap ng P20 million, kabilang na ang 1-kilometer farm-to-market road na nagkakahalaga ng P12 milyong piso, classrooms (P3 milyong piso), water at sanitation systems (P2 milyong piso), health station (P1.5 milyong piso), at livelihood projects (P1.5 milyong piso).

Ang P16.5-billion BDP budget ay direktang napunta sa local government units mula sa Department of Budget and Management (DBM).

Sinabi pa ni Badoy na hindi na siya nagulat sa naging alegasyon ni Zarate, inilarawan niya ito bilang “the mouthpiece” ni Communist Party of the Philippines (CPP) founding chair Jose Maria “Joma” Sison.

“Yung mga kasinungalingan ni Carlos Zarate that’s expected,” ani Badoy.

At dahil ang layunin ng BDP ay pigilan ang “generational poverty” at “ignorance” na pinagana ng CPP-NPA-NDF, sinabi nito na natural lamang para kay Zarate na hindi suportahan ang naturang programa.

“This will really eradicate this communist insurgency, which, of course Carlos Zarate does not want because he’s a member of the CPP-NPA-NDF [Communist-Party of the Philippines-New People’s Army-National Democratic Front]. It’s like, yung mga ipis gusto ba nila ng Baygon? Siyempre ayaw nila ‘yan ,” dagdag na pahayag nito.

Itinanggi rin niya ang paratang ni Zarate na sinira niya ang kahulugan ng “good governance” sa iresponsableng alegasyon nito hinggil sa red-tagging.

“I don’t understand why. I’m the public official that goes down on the ground and talks to our people. I’m the appointee of a President that believes that the way to end this insurgency is good governance,” ani Badoy.

Sa kabilang dako, sinabi ni Badoy na kailangan nang maalis sa Kongreso ang Makabayan bloc, dahil pinahintulutan nito di umano ang mga krimen na ginawa ng CPP-NPA-NDF.

Ang CPP-NPA ay kasama sa listahan bilang isang terrorist organization ng United States, European Union, United Kingdom, Australia, Canada, New Zealand, at Pilipinas.

“The Duterte administration stands for good governance. Sila, ang  Makabayan bloc, they enable the most heinous and most atrocious talaga crimes against the indigenous peoples so it’s him, they should be taken out of Congress,” dagdag na pahayag nito.

Gayunman, kumpiyansa naman si Badoy na batid ng mga mamamayang filipino kung dapat nga bang paniwalaan ang mga alegasyon ni Zarate.

“We expected no less from Carlos Zarate. But you know, the Filipino people are awake so Carlos Zarate sounds like a clown right now,” aniya pa rin.

Nauna rito, sinabi ni Zarate na ang budget ng NTF-ELCAC ay marapat lamang na gamitin bilang tulong sa mga labis na naapektuhan ng Covid-19 pandemic.

“That PHP19-billion allocated to them, mas mabuti pang gagamitin ‘yan  to give our people the much-needed ayuda  and not on red-tagging, not on fake surrenderers, not on tarpaulins announcing the possible run for election by these personalities associated with the NTF-ELCAC,” ayon kay Zarate. (Daris Jose)