TUGADE: AYUDA SA MGA TSUPER, ISINUSULONG NG DOTR, LTFRB

Imbes na direktang pagtataas ng pamasahe na makaka-apekto sa higit na nakararaming pasahero, isinusulong ng Department of Transportation (DOTr) at Land Transportation Franchising and Regulatory Board (LTFRB) ang pagbibigay ng ayuda sa mga driver ng mga pampublikong sasakyan sa gitna ng pandemya.

Ayon kay Transportation Secretary Art Tugade, itinutulak ng DOTr at LTFRB ang mga programa na magbibigay tulong, suporta, at ayuda sa mga driver at operator na hindi nangangailangang magpatupad ng pagtaas ng pamasahe.

Kinakailangang balansehin ang pangangailangan ng mga drayber sa kakayanan ng mga pasahero ngayong pandemya. Kaya imbes na direktang pagtataas ng pamasahe, ayuda sa drayber at ayuda sa pasahero ang itinutulak ng DOTr.

“We understand the situation that the drivers and operators are undergoing now, however, we also feel the situation of the commuters. We know that a lot of our fellowmen have lost their jobs and others have just returned to their work.  They are just now making a living so we think that it is not yet the proper time to implement a fare increase,” wika ni Tugade.

Ayon naman kay DOTr Assistant Secretary Mark Steven Pastor, masusing pinag-aaralan ng LTFRB ang petition sa fare hike na inihain ng mga transport group noong nakaraang linggo.  Daraan aniya ang petisyon sa mga pagdinig bago ang pagtukoy kung kailangang magtaas ng pamasahe.

Inihayag din ni Pastor na patuloy ang pakikipag-ugnayan ng DOTr at LTFRB sa Department of Energy (DOE) upang magkaroon ng uniform discount ang mga pampublikong sasakyan, partikular na ang mga jeepneys, sa lahat ng mga gas stations sa buong bansa.

Sumulat na rin ang DOTr at LTFRB sa DOE upang humingi ng suhestyon kung paano maiibsan ang epekto ng tuloy-tuloy na pagtaas ng presyo ng langis na ginagamit sa operasyon ng mga PUV, kasama na dito ang pagbibigay ng fuel subsidy.

“The DOTr and LTFRB have already written to the Department of Energy (DOE) to give us recommendations and ask for their cooperation for a program that would give a mandatory discounts in gas stations nationwide for the public utility vehicles,” saad ni Pastor.

Sinabi naman ni LTFRB chairman Martin Degra na kailangan na balansehin ang interes ng mamayan at mga drivers at operators.  Kinikilala ng LTFRB ang nararamdaman ng mga tsuper at operator, subalit kasabay nito ay kailangan din na maghanap ng solusyon na hindi rin matatamaan ang mas nakararami tulad ng mga mananakay.

Samantala, muling inaanyayahan ng DOTr at LTFRB ang mga drayber at operator na lumahok sa Service Contracting Program, kung saan sila ay babayaran ng gobyerno sa kada nakumpletong biyahe o trips, habang sinisiguro na mananatiling tuluy-tuloy ang kanilang pamamasada. Bilang konsiderasyon sa pagtaas ng presyo ng krudo, pinag-aaralan na rin na taasan ang insentibong ibinibigay sa ilalim ng programa.

Dagdag pa dito, hinihikayat din ang mga transport stakeholder na samantalahin ang libreng pagpapabakuna. Noong Hulyo, inilunsad ang vaccination drive para sa PUV drivers at ibang empleyado ng transport sector. Magagamit nila ang kanilang vaccination cards para makatanggap ng mga karagdagang diskuwento sa gas stations at mga kainan. LASACMAR