7 durugista nabitag sa drug ops sa Valenzuela

PITONG hinihinalang drug personalities, kabilang ang dalawang bebot ang nalambat ng pulisya sa magkakahiwalay na drug operation sa Valenzuela.

Ani PCpl Pamela Joy Catalla, alas-5 ng umaga nang magsagawa ang mga operatiba ng Station Drug Enforcement Unit (SDEU) sa pangunguna ni PLt. Joel Madregalejo ng buy bust operation sa San Vicente St., Brgy. Karuhatan na nagresulta sa pagkakaaresto kay Jeric Alolod, 24 at Bernadette Elejorde, 30, kapwa ng 610 Tangele St., Bancal Ext., Meycauyan, Bulacan.

Nasamsam sa kanila ang nasa 5 grams ng hinihinalang shabu na may standard drug price P34,000, P300 marked money, P100 cash at cellphone.

Alas-2:30 naman ng madaling araw nang respondehan ng kabilang team ng SDEU sa pangunguna ni PLT Doddie Aguirre ang natanggap na tawag mula sa concerned citizen hinggil sa nagaganap na illegal drug activities sa Pacheco Bypass Road, Brgy. Lawang bato na nagresulta sa pagkakaaresto kay Perlito Cuizon Jr., 41 at Richelle Puno, 35, therapist matapos maaktuhang nag-aabutan ng shabu.

Ayon kay PSSg Ana Liza Antonio, nakumpiska sa mga suspek nasa 10 grams ng hinihinalang shabu na nasa P68,000 ang halaga, cellphone, P600 cash at motorsiklo.

Nauna rito, nakuhanan din ng aabot sa 10 grams ng hinihinalang shabu na nasa P68,000 ang halaga at P30O cash ng isa pang team ng SDEU sa isinagawang validation sa Agapita St., Brgy. Gen T  De Leon dakong alas-11:20 ng gabi si Christopher Borbe alyas “Tetet”, 35.

Habang timbog din sina Archival Santos, 40, at Virgilio Delos Reyes, 49, matapos maaktuhan ng mga operatiba ng SDEU na nag-aabutan ng hinihinalang shabu sa Abalos Bukid Ext., Gumamela Duplex, Brgy. Gen T. De Leon dakong alas-3:15 ng madaling araw. Nakuha sa kanila ang tatlong transparent plastic sachets ng hinihinalang shabu at P350 cash. (Richard Mesa)