PBBM, kinilala at itinuturing ang mga mangingisda at magsasaka bilang mga bayani ng Pinas

ITINUTURING at kinilala ni Pangulong Ferdinand Marcos Jr. ang mga magsasaka at mangingisda bilang mga bayani ng Pilipinas dahil sa mahalagang papel na ginagampanan ng mga ito para sa mga Filipino.

Sa naging talumpati ng Punong Ehekutibo sa pagbubukas ng Agri Exhibit 2022 sa World Trade Center, inihayag ni Pangulong Marcos na unsung heroes na maituturing ang mga mangingisda at magsasaka na aniya’y katuwang sa pag-unlad ng bayan.

Dahil aniya sa kanila sabi ng Pangulo ay may pagkain sa  hapag kainan na siyang nagbibigay lakas at maipursige ang mga dapat gawin para sa patuloy na pag-angat ng bansa.

Sa gitna nito’y sinabi naman ng Pangulo ang iba’t ibang tulong na naipamahagi na ng pamahalaan sa mga mangingisda at magsasaka gaya halimbawa ng financial assistance at fuel discount program na umabot na sa 3 daan at 20 milyong piso.

Nandiyan na rin aniya ang quick response fund na pantulong din sa mga magsasaka at mangingisdang naging biktima ng kalamidad.

Sa kasalukuyan aniya ay nasa P1.54 bilyong piso na ang nailalabas ng gobyerno para sa may 17 milyong mga nakabenepisyo na sa naturang ayuda ng pamahalaan para sa mga nasa sektor ng agrikultura. (Daris Jose)