May mga pasabog at sorpresa sa fans: JULIE ANNE at RAYVER, ikukuwento ang love story sa kanilang concert

IKUKUWENTO nila Julie Anne San Jose at Rayver Cruz ang love story nila sa nalalapit na concert nila na JulieVerse sa November 26 sa Newport Performing Arts Theater.

Ayon sa “JulieVer” loveteam, nagsimula silang dalawa bilang co-hosts sa show na ‘The Clash’ hanggang sa maging more than friends na ang turingan nila. Kaya naman may mga pasabog at sorpresa ang dalawa bilang pampakilig sa kanilang mga fans.

“Sobrang excited kaming dalawa kasi first concert namin together, and may pagkakaiba ito sa Limitless. Ito namang Julieverse concert, mas collaborative ‘yung magiging konsepto ng concert. Gusto rin naming ialay ito para sa fans namin,” sey ni Julie.

Pinagmamalaki ni Julie ang pinakitang effort ni Rayver sa kanilang rehearsals. Ramdam ni Julie sa seryoso ito at gusto niyang lumabas na maganda ang performance nito sa concert.

“Sa bawat concert, kailangan laging may pasabog. Bagong pasabog ito. But not just me, we will do it together. So excited din ako na siyempre, mapanood din si Ray. Nakaka-proud lang kasi lalo siyang gumagaling, pagaling talaga siya nang pagaling,” may kilig na pahayag ni Julie.

Bukod kasi sa kanilang Tiktok dance moves, duets, hilig din nina Julie at Rayver na mag-jam sa music sa pamamagitan ng kanilang mga gitara. Si Julie pa raw ang nagturo kay Rayver para lalo pang gumaling sa pagtugtog ng gitara.

Naikuwento noon ni Rayver na bumili pa raw siya ng gitara dahil gusto niyang masabayan si Julie tuwing may collaboration sila sa Tiktok.

***

PERSONAL na tinanggap ni Miss International 2016 Kylie Versoza ang kanyang Best Actress award mula sa Distinctive International Arab Festivals Awards (DIAFA) 2022 sa Dubai, United Arab Emirates. Nanalo si Kylie para sa pelikulang The Housemaid.

Ang DIAFA ay isang prestigious award-giving body sa Dubai na every year ay ginagawad sa mga nagpakita ng husay sa larangan ng sining, kultura at kawanggawa.

“It means the world to me. To be awarded here in Dubai feels like a dream come true and such an honor. Today, I feel like winning another crown…and this time to (be) a best actress. Nothing ever beats the feeling of winning something for your own country because of your own hard work,” ” sey ni Kylie sa kanyang acceptance speech.

Marami ang natuwa sa pagkapanalo ni Kylie sa naturang festival na dati-rati ay naka-sentro lang sa mga Arab personalities. Ngayon ay bukas na silang magbigay ng parangal sa iba’t ibang nationalities.

“It is very special so to say because it has always been the Arabs who are flourishing in the industry but we also have good Filipinos that have to be honored. It’s very important … especially in the UAE that they’re focusing on diversity, sustainability and of course the latter stage innovation,” sey ni Glorianne Montefrio, founder ng 5G Project.

Sey naman ni He Hjayceelyn Quintana, Philippine Ambassador to the United Arab Emirates: “We’re very very proud that we have an awardee for tonight all the way from the Philippines … best actress award … This is one of the best-known awards in Dubai and it’s very important that they are beginning to acknowledge the presence of the Filipinos, the talent of the Filipinos, and dynamism of the Filipinos.”

Inalay nga ni Kylie ang kanyang pagkapanalo sa maraming overseas Filipino workers sa Dubai.

“Sobrang nakakataba ng puso na in-awardan ako dito sa Dubai kasi, there are around 5 million hardworking Filipinos in Dubai who have sacrificed their time, their efforts, their lives for their country, for their family so I dedicate this award to them,” sey pa ni Kylie.

***

PINALALABAS na sa streaming platform na Netflix ang digitally restored and remastered version ng 1982 film ni Ishmael Bernal na ‘Himala.’

Dahil sa Netflix, mapapanood na ng Gen Z ang isa sa pinagmamalaking pelikula ng ating bansa.

Bida sa ‘Himala’ ay ang hinirang na National Artist na si Superstar Nora Aunor. Isa ito sa pinaka-iconic film roles ni Ate Guy kunsaan gumanap siya si Elsa, ang probinsyanang nakita ang aparisyon ng Mahal na Birhen sa isang burol at bigla siyang nagkaroon ng kapangyarihang manggamot ng may mga sakit sa kanilang barrio.

Produced ng ECP or Experimental Cinema of the Philippines, naging official entry sa 1982 Metro Manila Film Festival ang Himala kunsaan napanalunan nito ang 9 awards including Best Picture, Best Director, Best Actress (Nora Aunor), Best Supporting Actor (Spanky Manikan) and Best Supporting Actress (Gigi Duenas).

Nag-compete ang ‘Himala’ sa Berlin, Venice at Chicago International Film Festivals. Ginawa rin itong stage musical noong 2018 kunsaan ang gumanap na Elsa ay si Aicelle Santos.

Hinirang naman na Best Film of All Time ng Asia-Pacific Region ang Himala sa 2008 CNN Asia Pacific Screen Awards.

Pinili rin ang ‘Himala’ ng Manunuri ng Pelikulang Pilipino bilang Ten Best Films of the Decade.

(RUEL J. MENDOZA)