Pacquiao nagpahayag ng pagbabalik sa ring matapos ang panalo kay DK Yoo

NAGPAHAYAG ng tuluyang pagbabalik sa boxing ring si Filipino boxing icon Manny Pacquiao.

Kasunod ito sa panalo niya sa exhibition fight laban kay martial artist DK Yoo sa Goyang, South Korea.

Nakita nito kaya niyang patumbahin ng maaga ang malaking kalaban sa kanilang six-round charity boxing match subalit mas minabuti pa ng dating senador na manalo sa pamamagitan ng unanimous decision.

Mas higit pa ito aniya sa panalo dahil sa nakikita niya ang kaniyang pagbabalik sa boxing ring.

Sa nasabing laban kasi ay dalawang beses nitong pinabagsak si Yoo sa ikalimang round.

Ayon sa 43-anyos na Filipino boxing champion na labis na hinahanap ng kaniyang katawan ang boxing kaya hindi nito lubos maisip kung walang boxing.

Hindi naman nito kinumpirma kung babalik siya sa boxing ring sa susunod na taon.

Huling lumaban si Pacquiao ay noong 2021 ng talunin siya ni Urdonis Ugas ng Cuba at nag-anunsiyo na siya ng kaniyang pagreretiro sa record na 62 panalo, walong talo at dalawang draw na mayroong 36 knockout. (CARD)