PBBM sinuspinde ang LTFRB chairman

SINUSPINDE  ni President Ferdinand R. Marcos si Land Transpotation Franchising and Regulatory Board (LTFRB) chairman Teofilo Guadiz dahil sa alegasyon ng korupsyon na binabato sa kanya.

Ang Presidential Communications Office (PCO) ang nagbigay ng anunsiyo sa kanyang suspensyon. Nag-utos naman si President Marcos ng isang imbestigasyon sa nasabing alegasyon.

“The President does not tolerate any misconduct in his administration and has instructed the immediate investigation on this matter. He strongly condemns dishonesty and duplicity in public service,” ayon sa PCO.

Si Guadiz ay sinuspinde dahil sa pagsisiwalat ng mga katiwalian ng kanyang dating senior executive assistant na si Mr.  Jeffrey Tumbado sa isang press conference ang ginawa noong Lunes na pinangunahan ng grupong Manibela.

Ayon kay Tumbado ay kanilang pinagusapan noong nakaraang March ni Guadiz kung paano sila makakakuha ng “benefit” sa mga “lagayan scheme” sa ahensiya habang kanya rin inakusahan ang ibang ahensiya at ang Malacanang na kasama rin sa korupsyon.

“I do not believe that he is the only one, there is also instruction from higher ups… I believe this chairman is also a victim,” saad ni Tumbado.

Sinabi rin niya ang mga “under-the-table” na transaksyon na ginagawa sa LTFRB ay ang modipikasyon ng ruta, pagbibigay ng priority sa mga papales tungkol sa prangkisa at pagbibigay ng special permits. Dagdag pa niya ang bawat illegal na transaksyon ay umaabot ng P3 million ang lagayan kung saan puwedeng mayroon dalawang hulugan ang bayaran.

Nilinaw naman ni Tumbado na wala sa mga miyembro ng LTFRB board ang deritsahang humihingi ng pera sa mga aplikante at sa halip ay tumatangap sila sa ibang tao o ang tinatawag na fixer. Hindi naman niya pinangalanan ang mga nasabing tao.

Binigyan diin niya na di siya isang “bag man” subalit tumanggi siyang sabihin kung ano ang eksaktong partipasyon niya sa mga nasabing illegal na transaksyon.

Nang tanungin siya sa ginawang press conference kung bakit siya ay lumantad sa publiko at kung saan niya tinukoy ang mga impormasyon tungkol sa korupsyon, sinabi niya na gusto lamang niya na ituwid ang mga maling bagay at upang makatulong sa mga taong naaagrabiyado na apektado ng illegal na transaksyon.

Saad din niya na may pakiramdam siya na magiging “sacrificial lamb” siya kapag mas naging maiinit ang issue tungkol dito.

Isa sa mga ebidensya na nasa kamay niya ngayon sa mga nasabing kurupsyon maliban sa mga personal statements, ay ang mga screen shots din at audio recordings ng mga pag-uusap ng mga taong kasangkot sa mga illegal na transaksyon.

Maghahain naman siya ng kaso tungkol sa paglabag ng Republic Act 3019 o ang tinatawag na Anti-Graft and Corrupt Practices Act, at RA 11032 o mas kilala sa Ease of Doing Business Act ngayon linggong ito.

Si Department of Transportation (DOTr) Secretary Jaime Bautista naman ay nagutos na rin kay Guadiz na magpaliwanag sa mga alegasyon ng korupsyon na nangyayari sa LTFRB. LASACMAR