Top 10 most wanted person ng Valenzuela, nadakma

KINALAWIT ng pulisya ang isang lalaki na nakatala bilang top 10 most wanted matapos masuko sa isinagawag manhunt operation sa Valenzuela City, kamakalawa ng hapon.

Kinilala ni Valenzuela police chief P/Col. Salvador Destura Jr., ang naarestong akusado na si alyas “Dennis”, 33 ng Brgy., Punturin ng lungsod.

Sa kanyang report kay Northern Police District (NPD) Director P/BGen. Rizalito Gapas, sinabi ni Col. Destura na nakatanggap ng impormasyon ang mga operatiba ng the Station Intelligence Section (SIS) na naispatan ang presensiya ng akusado sa kanilang lugar.

Bumuo ng team ang SIS sa pangunguna ni P/Cpt. Ronald Sanchez saka nagsagawa ng intensified manhunt operation kontra wanted persons na nagresulta sa pagkakadakip sa suspek dakong alas-5:15 ng hapon sa Lot. 1, Blk. 24, Green Meadows, Brgy., Punturin.

Ani Cpt. Sanchez, inaresto nila ang akusado sa bisa ng warrant of arrest na inisyu ni Valenzuela City Regional Trial Court, Branch 270 Presiding Judge Evangeline S. Mendoza Francisco noong October 6, 2021, para sa pagabag sa Sec. 5 (B) Art. III of R.A. 7610 – Child Abuse Law.

Pinapurihan naman ni Gen. Gapas ang Valenzuela police sa kanilang pinaigting na kampanya kontra wanted persons na nagresulta sa pagkakadakip sa akusado na pansamantalang nakapiit sa Custodial Facility Unit ng Valenzuela CPS habang hinihintay ang pagpapalabas ng commitment order ng korte. (Richard Mesa)