Nakatakda sa Oct. 7… PBBM, inaprubahan ang P7.9-B para sa immunization drive na Bakuna Eskuwela

INAPRUBAHAN ni Pangulong Ferdinand R. Marcos Jr. ang paglalaan ng P7.9 billion para sa national immunization program ng Department of Health’s (DOH).

Sa press briefing sa Malakanyang, sinabi ni Health Secretary Teodoro Herbosa na ibinigay ni Pangulong Marcos ang kanyang pagsang-ayon sa isinagawang sectoral meeting kasama ang mga opisyal ng DOH sa pangunguna ni Herbosa sa Palasyo ng Malakanyang sa Maynila, araw ng Martes.

Sinabi ni Herbosa na ang inaprubahang budget ay mas mataas kaysa sa nagdaang budget na P6.4 billion budget na inilaan para sa immunization program ng departamento.

“Naibigay ni Presidente ‘yung aking ni-request na full budget. First time po ito. Lagi pong 60 to 70 percent lang nang hinihingi. But this is the first time our President really allocated PHP7.9 billion para sa mga pambili lang ng mga bakuna lamang po iyan,” ang sinabi ni Herbosa.

Sinabi pa ni Herbosa, ang DOH, sa pakikipagtulungan sa Department of Education (DepEd), maglulunsad din ng “Bakuna Eskuwela” campaign sa buong bansa sa Oktubre 7, sa pagsisikap na palakasin ang national immunization program at tugunan ang bumababang immunization rate sa bansa.

Sinabi pa nito na sakop ng Balik Eskuwela Program ang mga estudyante ng Grade 1, 4, at 7 sa lahat ng pampublikong paaralan sa buong bansa.

“Under the school-based immunization program, vaccines for human papillomaviruses (HPV), measles, rubella, tetanus, and diphtheria will be administered to the students,” ang winika naman ni Malacañang Press Briefer Daphne Oseña-Paez.

Nilinaw naman ni Herbosa na ang pagbabakuna ay hindi sapilitan at kailangan pa rin ng consent o pahintulot ng mga magulang.

“Kailangan pa rin ng parental consent. Of course, right of refusal pa rin,” ang naging pahayag ni Herbosa.

“And then, ang usual process naming, pag may nagrefuse na parents, ‘yung health workers na naming ang pumupunta at ini-interview, tinatanong bakit ayaw magpabakuna. And then we try to convince them, baka maling information, maraming nababasa sa social media,” lahad ng Kalihim.

Samantala, sinabi ni Herbosa na ang mga estudyante mula sa pribadong eskuwelahan ay maaaring ring mag-avail ng vaccination drive, binigyang-diin na titiyakin niya na “the program will not refuse any child.” (Daris Jose)