PBBM, balik-Pinas matapos ang inagurasyon ni Indonesian President Prabowo Subianto

BALIK-PINAS na si Pangulong Ferdinand R. Marcos Jr., Lunes ng umaga matapos makiisa sa inagurasyon ni Indonesian President Prabowo Subianto.

Sina Pangulong Marcos at Unang Ginang Liza Araneta-Marcos ay lumapag sa Maynila ng alas-5 ng madaling araw, ayon sa Communications Secretary Cesar Chavez.

Nakiisa ang First Couple sa ibang world leaders na sinaksihan ang inagurasyon ng Indonesian leader sa House of Representatives Building sa Jakarta.

Ang First Couple ay inimbitahan ng predecessor ni Prabowo na si Joko Widodo, na ang pinakamatandang anak na si Gibran Rakabuming Raka, ay naging pinakabatang vice president ng Indonesia.

Matatandaang, binisita ni Prabowo ang Maynila noong nakaraang buwan at nakipagpulong kay Pangulong Marcos sa Palasyo ng Malakanyang kung saan pinagtibay ng mga ito ang kanilang pananaw para sa ‘greater ties’ ng kanilang mga bansa. ( Daris Jose)