15-ANYOS NA BINATILYO TIMBOG SA P28K SHABU

ISANG 15-anyos na binatilyo ang arestado matapos makuhanan ng higit sa P28,000 halaga ng shabu sa isinagawang buy-bust operation ng pulisya sa gitna ng lockdown sa Navotas city, kamakalawa ng gabi.

Kinilala lang ang suspek sa alyas “Enteng” na natimbog ng mga operatiba ng Navotas Police Station Drug Enforcement Unit (SDEU) dakong alas-8::05 ng gabi sa kahabaan ng Judge A. Roldan St. Brgy. San Roque matapos bentahan ng isang plastic sachet ng shabu ang isang police poseur-buyer kapalit ng P300 marked money.

Ayon kay Navotas police chief P/Col. Rolando Balasabas, nakumpiska ng mga operatiba ng SDEU sa pangunguna ni P/Lt. Genere Sanchez kay Enteng ang 11 plastic sachets na naglalaman ng aabot sa 4.1 gramo ng hinihinalang shabu na tinatayang nasa P28,880.00 ang halaga at buy-bust money.

Sinabi pa ni Col. Balasabas, ang suspek ay hindi kabilang sa list ng mga hinihinalang drug personality subalit, dahil sa ilang mga reklamo na kanilang natanggap hinggil sa kanyang illegal na aktibidad ay isinailalim ito ng mga operatiba ng SDEU sa surveillance operation.

Nang makumpirma na sangkot ito sa pagbebenta ng illegal na droga ay agad nagkasa ng buy-bust operation ang mga operatiba ng SDEU kontra sa suspek na nagresulta sa pagkakaaresto sa kanya. (Richard Mesa)