Utos ni PBBM sa DILG, tiyakin ang mapayapa at maayos na halalan, 2025

IPINAG-UTOS ni Pangulong Ferdinand R. Marcos Jr. sa Department of Interior and Local Government (DILG) na tiyakin ang mapayapa at maayos na halalan sa susunod na taon.

“The most immediate here is the elections,”ang sinabi ni Pangulong Marcos sa sectoral meeting, araw ng Martes sa Palasyo ng Malakanyang.

Sa naturang pulong, sinabi ni DILG Secretary Juanito Victor “Jonvic” C. Remulla Jr. kay Pangulong Marcos na magsasagawa ng isang special meeting ang mga kinauukulang ahensiya ng gobyerno gaya ng Commission of Elections (Comelec), Department of National Defense (DND), Philippine National Police (PNP) at DILG sa Nov. 15 para talakayin ang mga hakbang para sa naging direktiba ng Punong Ehekutibo.

Ang kautusan ng Pangulo ay sa gitna ng ulat na may ilang lugar ang may mga kaso na ng karahasan.

Gayunman, hindi pa kumpirmado ang mga kasong ito kung ito ay election-related.

Samantala, sinabi ng Pangulo na nais niyang makausap ang mga pamilya at liderato ng Bangsamoro Autonomous Region in Muslim Mindanao (BARMM) para sa mapayapa at maayos na halalan.

“Magtanong na rin tayo sa mga magiging leadership ng BARMM. We can ask the chief minister what he thinks,” ang tinuran ng Pangulo.

“Same thing, we talk to the families. We talk to the families what they think. I’m interested to hear what they have to say. Hindi pa natin sila kinokonsulta about this,” aniya pa rin.

Sinabi naman ni Remulla na mahigpit silang nakikipagtulungan sa lahat ng mga kinauukulang ahensiya ng pamahalaan kabilang na ang PNP at Armed Forces of the Philippines (AFP) para siguraduhin na ‘no election-related violence’ na mangyayari. ( Daris Jose)