Matandang binata, kulong sa pananapak sa bebot sa Malabon

BINITBIT sa selda ang 44-anyos na matandang binata nang sapakin ang babaing serbidora nang walang pumatol sa kanyang pagwawala at paghahamon ng away sa Malabon City.

Kahit nasa loob na ng barangay hall ng Brgy. Tonsuya, hindi pa rin natigil ang pagwawala ng suspek na si alyas “Gilbert” matapos siyang imbitahan ng mga nagrespondeng barangay tanod kaya pinosasan na siya ng mga tauhan ni Malabon police chief P/Col. Jay Baybayan na hiningan ng tulong ng mga opisyal ng barangay.

Ayon kay Col. Baybayan, dakong alas-5:50 ng madaling araw, nagwawala at naghahamon ng away ang suspek sa tapat ng kanyang bahay sa Block 3 Kadima, Brgy. Tonsuya subalit, walang pumapatok sa kanya.

Dito, napagbalingan ng galit ng suspek ang 24-anyos na serbidora sa isang komedor na si alyas “Angelica” na naglalakad ng pauwi.

Biglang hinila ng suspek sa buhok ang biktima sabay inundayan ng sapak sa ulo na naging dahilan upang pagtamo ang bebot ng sugat.

Sinabi ni Col. Baybayan na sasampahan nila ng kasong physical injuries at alarm and scandal ang suspek batay sa reklamo ng biktima sa Malabon City Prosecutor’s Office. (Richard Mesa)