BABAENG TAIWANESE NA WANTED, INARESTO SA PANLOLOKO

NAARESTO ng Bureau of Immigration (BI) ang isang babaeng Taiwanese na wanted ng mga awtoridad sa Taipei dahil sa panloloko sa kanyang mga kababayan ng mahigit sa US$7 million dollars may dalawang taon na ang nakakaraan.

Sa ibinigay na report kay Immigration Commissioner Jaime Morente ng BI’s fugitive search unit (FSU), kinilala ang suspek na si Li You-Ci, 31 na inaresto sa Camp Crame, Quezon City.

Unang iniulat na si Li ay na-rescue ng mga alagad ng batas mula sa kanyang mga kidnappers subalit lumabas sa record na si Li ay isang dayuhan na wanted sa Taiwan.

Si Li ay naaresto ng BI-FSU  sa bisa ng mission order  na inisyu ni Morente dahil sa kahilingan ng mga awtoridad sa Taiwan.

Ayon kay BI-FSU acting chief Rendel Ryan Sy, si Li ay  tinutukoy sa isang outstanding arrest warrant na inisyu noong Abril ng Kinmen District Prosecutor’s Office sa  Taiwan.

Sinabi ni Sy na si Li ay kinasuhan ng panloloko sa nasabing korte dahil sa panlilinlang sa kanyang mga biktima ng mahigit 200 new Taiwan dollars, o US$7.1 million bilang investment scam.

Sinasabing hinikayat ni Li ang kanyang mga biktima na nag-invest sa kanyang negosyo subalit lumabas na peke pala ito saka ito tumakas dito sa Pilipinas  dala ang pera.

Sa record ng BI’s travel database si Li ay overstaying na ng mahigit dalawang taon  kung saan nagtago siya sa bansa noon pang August 2019 bilang isang turista. (GENE ADSUARA)