Dahil na-witness ang kakaibang passion ng mga volunteers: ANGEL, walang panghihinayang at nagpasalamat kay VP Leni sa inspirasyon

PARA kay Angel Locsin, wala raw dapat panghinayangan kung sa unofficial result ng election ay halos kalahati na ang percentage ng lamang ni Bongbong Marcos kay VP Leni Robredo.

Isa si Angel sa passionately at nangampanya para kay VP Leni.  At kahit na hindi ang inaasahang turn-out sana ng election ang nagaganap, para sa actress, wala raw dapat panghinayangan dahil na-witness niya ang kakaibang passion ng mga volunteers. 

Sey ni Angel, “To my fellow Leni volunteers, na-witness ko ang kakaibang passion na ibinigay natin sa eleksyong ito.  I am proud to have fought with you to the very end.

“Huwag kang manghina dahil binigay natin ang lahat ng walang pag-aalinlangan.  Hindi tayo naging madamot. Itinaya ang pangalan at oras. Lumaban kahit mahirap para sa ating paniniwala at sa kapwa.  

“Kahit imposible, lumaban tayo hindi para sa isang tao, kundi para sa bayan. Kaya kahit matatapos na ang bilangan, piliin pa rin natin ang bayan. Piliin pa rin natin ang Pilipinas.  Patuloy tayong magpakita ng malasakit at kumilos para sa kapwa. Ipinagdarasal ko na darating rin ang araw na makikita natin ang Pilipinas na minimithi. Taas noo.”

At saka niya sinabi na, “Salamat Mam Leni sa inspirasyon.”

Nagpasalamat naman kay Angel ang maraming netizens, kabilang na ang mga ibang mga celebrities na nakakasama niya sa bawat campaign rally. 

Si Jerald Napoles ay tinawag pang superhero si Angel.  Aniya, “Ikaw ang superhero ng Pilipinas. Hindi kailangan nang botohan dun.”

***

IBANG level na si Ejay Falcon.

Unang attempt niya na tumakbo sa pulitika at bilang Bise Gobernador ng Oriental Mindoro, aba, panalo agad.

Isa nga si Ejay na tulad din ni Arjo Atayde at Angelu de Leon na mga first time pasukin ang pulitika, pero mga winner na agad.

Nagpasalamat na si Ejay at nag-post sa kanyang Facebook account.

Sey ni Ejay, “Sa lahat po ng nanindigan, nagpakita ng suporta, nagtiwala, nagmahal at bukas palad na tumanggap sa isang Ejay Falcon, hindi bilang artista kundi bilang isang kababayan nyo na nag nanais maglingkod ng buong puso, MARAMING MARAMING SALAMAT PO. 

“Hindi naging madali ang laban pero bawat isa po sa inyo ang dahilan kung bakit po tayo nagtagumpay. Ilang beses po tayong ibinaba, minaliit at hinusgahan pero kayo po ang nag angat at nag panalo sa isang Ejay Falcon. 

Utang ko po sa inyo ito at hayaan nyo pong bayaran ko kayo ng tapat at malinis na paglilingkod. 

“Ang mga ngiti, palakpak at hiyaw nyo po ang nagbigay sa akin ng lakas na kaya natin ito. Hindi ko po maipaliwanag sa mga salita ang saya at galak na nararamdaman ko ngayon dahil gustong gusto ko na pong magsimulang maglingkod sa inyo. 

“Sa lahat ng mga kabataan, ito na si Ejay Falcon ang Kuya nyo sa Sangguniang Panlalawigan. Umasa po kayo mga kababayan ko na may action star po kayo na magtatanggol at tutulong para sa kapakanan at interes ng lalawigan at magbibigay ng dobleng aksyon para sa mga mamamayan. 

Ito po ang bagong Bise Gobernador ng Oriental Mindoro, ready to serve you.”

(ROSE GARCIA)