Dahil priceless yun at ipagmamalaki hanggang tumanda: ALLEN, nalungkot din sa ginawang pagbenta ni JIRO sa kanyang Best Actor trophy

NAGING malaking balita ang tungkol sa pagbebenta ni Jiro Manio ng kanyang 2004 Gawad Urian Best Actor trophy (para sa ‘Magnifico’) sa kolektor at Pinoy Pawn Stars vlogger na si Boy Toyo.

Dahil sa pangangailangan sa pera ay ibinenta ni Jiro kay Boss Toyo sa halagang seventy five thousand pesos ang acting trophy.

At bilang may limampung acting trophies na mula sa iba-ibang award-giving bodies dito sa Pilipinas at maging sa ibang bansa, ay hiningan namin ng reaksyon tungkol dito si Allen Dizon.

“Hindi ako si Jiro e,” umpisang sinabi ni Allen. “Hindi ako ang nasa posisyon niya, e. Hindi ko alam kung ano yung nasa isip niya, ano ang nasa utak niya, kung kailangan niya ng pera, kailangan niya ng ganito.

“Pero siyempre kung ikaw artista ka, kumbaga ipagmamalaki mo na yan hanggang tumanda ka na, hanggang sa mga apo mo, at kapag namatay ka na meron kang legacy na, ‘Ito si Jiro Manio Best Actor ng Urian!’

“It’s priceless, hindi mo puwedeng ibenta ng kahit magkano yan.”

Kaya nga nalungkot si Allen ng nalaman ang nangyari.

“Siyempre ako… I can’t imagine na yung mga anak ko ibebenta nila yung trophy ko kapag namatay ako. Di ba?

“Kumbaga hindi mo sila puwedeng bigyan ng idea na, ‘O pag namatay na ako benta niyo ‘to para magkapera kayo.’

“Hindi, e! Kumbaga priceless yun, hindi mo mabibili ng pera yun. Kumbaga pinaghirapan mo yun mula nung time na nag-artista ka, iyon yung validation mo, iyon yung pagkilala sa iyo na magaling kang artista.”

Gipit sa pera si Jiro kaya nagawa nito ang magbenta ng tropeyo.

Lahad ni Allen, ”Iyon nga, wala kasi ako sa ano ni Jiro, wala ako sa posisyon niya pero hindi ko siya masisisi.

“Pero sa akin as an actor, sa akin, hindi ko puwedeng ibenta yung alam kong priceless sa akin, e.

“Kasi parang binenta ko yung pagkatao ko. Parang, wow!

“So lahat na lang pala ng trophy puwedeng ibenta? So ikaw ang Best Actor, pero wala kang proof.”

Nakausap namin si Allen kamakailan sa birthday party ni Baby Go na isang film producer sa pamamagitan ng kanyang BG Productions International na siyang producer ng AbeNida nina Allen at Katrina Halili na malapit nang ipalabas sa mga sinehan.

Isa sa mga nakaplanong gawin ng BG Productions International this year ang isang horror family drama ng direktor na si Joel Lamangan kung saan ang nais sana nilang maging cast members kung matutupad ay sina Carmina Villarroel, Richard Yap at Beauty Gonzales also hopefully with Jillian Ward, Ken Chan, Seth Fidelin at Juan Carlos Labajo.

Naka-lineup na rin ang pelikula nina Allen at Bela Padilla na kukunan sa Australia sa direksyon ni Adolf Alix, Jr;  isang pelikula with Pokwang to be directed by Louie Ignacio  at isang comedy flick directed by Neal Tan na bida ang mga  music icons na si Pilita Corrales, Imelda Papin, Eva Eugenio at Dulce.

***

HINDI tutol si Celeste Cortesi na pasalihin ang mga transwomen, mga dating lalaki na babae na ngayon dahil sa operasyon, sa anumang beauty pageant, tulad ng Miss Universe.

“Well I think that’s not even like, like a news, we had it before, and there’s nothing wrong with it, to be honest. It’s not about the sex, the age, the beauty anymore, it’s more about what you can bring in the table,” pahayag ni Celeste (Che-leste ang bigkas) na Miss Universe Philippines winner noong 2022.

Pagpapatuloy pa ni Celeste, ”And these women they have such inspirational backgrounds that’s why they join Miss Universe, that’s why they the chance to be Miss Universe.

“So I think I will always choose to see the positive side to it and this is positivity and it gives more chances for more women.”

Hindi raw siya masasaktan kapag tinalo siya ng isang transwoman sa isang beauty pageant.

“I wouldn’t be mad about it, I cannot be mad about it, I cannot be mad about it.

“It’s her space, it’s her right to win,” sinabi pa ni Celeste na gumaganap bilang si Diamond Ricci sa season 2 ng ‘Walang Matigas Na Pulis Sa Matinik Na Misis’ ng GMA tuwing Linggo, 7:15 pm.

(ROMMEL L. GONZALES)