DIVI MALL GIGIBAIN, VENDORS ILILIPAT SA PRITIL MARKET

NAKATAKDANG ilipat ang may 500 manininda na nakapuwesto sa Divisoria Public Market na nakatakdang gibain ngayong taon.

Ayon kay Manila City Administrator Felixberto Espiritu, sa oras na matapos ang konstruksiyon sa ikalawang palapag ng Pritil Market ay maaari nang lumipat ang mga nasabing vendors na magmumula sa Divisoria Public Market ng Divisoria Mall, ngunit dapat ay magsumite muna sila ng aplikasyon para sa kanilang ookupahing pwesto dito.

“Lahat ng manininda sa Divisoria Market ilalagay doon sa 2nd floor sa Pritil, walang madidisplace,” ani Espiritu.

“However, before March they have to apply for a space at Pritil Market. Yung hindi mag-aaplay, hindi mabibigyan,” dagdag pa ng opisyal.

Bukod sa aplikasyon, sinabi din ni Espiritu na ang mga manininda na hindi taga-Maynila ay hindi mabibigyan ng pwesto sa Pritil Market.

“Kahit nakapwesto sila ngayon sa Divisoria market at hindi sila taga-Maynila hindi sila bibigyan ng pwesto sa Pritil. It is exclusive to the Manilans,” giit ni Espiritu.

Aniya, gigibain ang buong Divisoria Mall at itatayo ang isang 54 story commercial building kung saan mas malaki umano ang kikitain ng pamahalaang lungsod mula sa buwis nito kumpara sa nirerentahang pwesto ng mga manininda na P40 kada araw.

Ang dagdag na buwis ay maaaring gamitin ng lokal na pamahalaan upang mas mabigyan ng magandang serbisyo at benepisyo ang mamamayan ng lungsod ng Maynila.

Hindi naman sang-ayon si Espiritu sa panawagan ng mga vendor sa Divisoria Market na pagbigyan silang makapwesto sa labas ng palengke habang ginagawa ang nasabing lugar dahil mismong si Mayor Isko Moreno Domagoso na nga ang nag-utos na linisin ang kalsada at mga kalye sa Maynila kung saan aalisin ang lahat ng klase ng obstruksiyon na nakasasagabal sa mga tao at sasakyan.   (GENE ADSUARA )