DND iba-validate ang babala ng Japan sa ‘terrorist threat’ sa Southeast Asia kabilang ang Pilipinas

Iba-validate ng Department of National Defense (DND) ang inilabas na babala ng Japan ukol sa umano’y bantang terorismo sa ilang bansa sa Southeast Asia, kabilang ang Pilipinas.

Ito ang inihayag ni DND Spokesperson Arsenio Andolong kaugnay ng inilabas na travel advisory ng Japanese Foreign Ministry sa kanilang mga mamayan sa anim na bansa sa Southeast Asia na umiwas sa mga matataong lugar dahil sa posibleng suicide bombing.

Ayon kay Andolong ang lahat ng mga ulat tungkol sa kaligtasan at seguridad ng mga komunidad ay dumadaan sa proseso ng validation.

Sinabi ni Andolong na kasunod ng Marawi Rebellion, ang DND at AFP ay palagiang nasa “heightened alert” sa galaw ng mga terorista.

Aktibo aniya silang nakikipagtulungan sa mga kinauukulang ahensya ng pamahalaan, kabilang ang Anti-Terrorism Council upang I-assess ang lahat ng posibleng banta ng terorismo.

Una naring inihayag ng AFP na sineseryoso nila ang babala ng Japan, bagamat sa panig ng militar ay wala silang na-monitor na banta at nasa “moderate threat Level” lang ang bansa.

Una ng sinabi ni AFP Spokesperson Col. Ramon Zagala na patuloy ang kanilang kampanya para labanan ang terorismo sa bansa partikular na sa Mindanao.

Pinalakas din ng AFP ang kanilang intelligence monitoring lalo na duon sa mga posibleng maglunsad ng suicide bombing.

Dagdag pa ni Zagala, ipagpapatuloy ng AFP ang kanilang pakikipaglaban sa terorismo sa pamamagitan ng intensified internal security operations.