‘Face unlock, fingerprint biometrics’ posibleng gawing requirements sa pagboto

NAGPAHAYAG  ng kahandaan ang Commission on Elections (Comelec) na posibleng gawing requirements sa mga susunod na eleksyon ang ‘face unlock at fingerprint biometric features’ para makaboto ang isang botante.

Inihayag ito ni Comelec Commissioner George Garcia makaraang ipanukala ni Vice President Sara Duterte na isama ang naturang mga biometrics na mga security features ngayon sa mga cellular phones, sa eleksyon para makumpirma ang pagkakakilanlan ng isang botante at para maiwasan ang flying voters.

Sa kaniyang talumpati sa ikalawang araw ng Election Summit ng Comelec, sinabi Duterte na sa limang beses niyang paglahok sa halalan bilang kandidato, ki­numpirma niya na totoo ang ‘flying voters’ sa Min­danao, kung saan nakakaboto ang mga botante ng Davao City sa siyudad sa umaga at sa ibang probinsya naman tuwing hapon.  Kung magkakaroon umano ng mas mahigpit na seguridad sa pagtukoy ng pagkatao, maiiwasan ang naturang uri ng dayaan sa eleksyon.

“Hindi ito lingid sa kaalaman ng Comelec. Sa pagkuha ng bagong mga teknolohiya, posibleng isama dito ang biometrics technology dahil sayang naman ang database ng komisyon na nakukuha tuwing registration,” ayon kay Garcia.

Ipinaliwanag niya na tuwing magpaparehistro, kinukunan ng Comelec ng fingerprint at litrato ang isang nagpaparehistro na maaari nilang magamit kung sakaling makakakuha ng teknolohiya ukol dito.

Kinondena rin ni Duterte ang nangyayaring karahasan ngayon sa mga lokal na opisyal ng pamahalaan tulad ng pamamaslang kay ­Negros Oriental Governor Roel Degamo at nanawagan sa Comelec na bumuo ng mga polisiya para maiwasang mangyari ang mga ito.

Sumang-ayon naman si Garcia at sinabi na dapat mas maging maigting ang kanilang paghahanda sa darating na Barangay at Sangguniang Kabataan Elections na kilalang mainit ang labanan ng mga lokal na kandidato. (Ara Romero)