Galvez, ipinanukala ang pagbabakuna laban sa covid 19 sa mga kabataang may edad na 12 hanggang 17 sa kalagitnaan ng Oktubre

IPINANUKALA ni Vaccine czar Carlito Galvez Jr. ang pagbabakuna sa mga menor de edad o 12 hanggang 17 taong gulang laban sa COVID-19 na magsisimula sa kalagitnaan ng Oktubre.

Sa Talk to the People ni Pangulong Rodrigo Roa Duterte, araw ng Miyerkules, sinabi ni Galvez na ang gobyerno ng Pilipinas ay mayroong 23.75 milyong bakuna na naka- stock habang may karadagang 20 milyon naman ang inaasahan na darating sa bansa sa unang linggo ng Oktubre.

“We are proposing to open the vaccination for children by mid October, kasi by mid October may additional pa tayong 20 million na dadating plus ‘yung 23 million, kayang-kaya na natin ma-vaccinate ‘yung 12 million na bata, na 12 to 17,” ayon kay Galvez.

“Pero ang recommendation natin, mauna muna po ‘yung may comorbidities atsaka po ‘yung mga anak po ng mga healthcare workers,” dagdag na pahayag nito.

Matatandaang, nito lamang Setyembre 19, inaprubahan ng panel of experts ng pamahalaan ang pagbabakuna ng COVID-19 para sa mga kabataan.

Aniya, nakararanas ngayon ang bansa ng “saturation point’ sa National Capital Region at iba pang lungsod.

“Meaning parang nag mi-meet na po ‘yung demand at saka ‘yung supply. Meaning kailangan na natin mag-open ng other sectors,” anito.

Nauna rito, sinabi ni Galvez na nakatakdang magsimula ang pamahalaan ng pagbabakuna sa general public sa susunod na buwan.

“By November po, or even earlier, pwede na po nating i-open ang general public,” ani Galvez. (Daris Jose)