Halos 300K tropa ng AFP, PNP magbabantay sa BSKE

PINANGUNAHAN kahapon ng Commission on Elections (Comelec) ang “ceremonial send-off” sa halos 300,000 uniformed personnel na itatalagang magbantay sa darating na Barangay at Sangguniang Kabataan Elections (BSKE).

Halos 180,000 tauhan ng Philippine National Police (PNP) at halos 100,000 tauhan naman ng Armed Forces of the Philippines (AFP) ang inaasahang magbibigay ng seguridad sa buong bansa sa Oktubre 30.

Bukod sa kanila, may mga tauhan ding ipadadala ang Philippine Coast Guard (PCG) na mamamahala naman sa seguridad sa mga karagatan at pagbibiyahe ng mga elections materials sa mga island barangays.

Sinabi ni Comelec Chairman George Garcia na ang deployment ay hindi ibabase sa color category ng isang lugar.  Hinati ang mga barangays sa kategorya na “green, yellow, orange at red” depende sa antas ng problema sa private armed groups o tero­rista, at kabilang din ang tindi ng political rivalry.

Noong Oktubre 4, nasa 242 lugar na sa bansa ang nailagay sa red category at umakyat pa sa 361 nitong Oktubre 20.

Nadagdag naman ang Libon sa Albay na nasa ilalim ng Comelec control, bukod sa Negros Oriental. Ito ay dahil sa pagpaslang sa isang kandidato sa pagka-barangay chairman at isang kagawad.