Higit 1,300 trainees, nagtapos sa libreng skills training sa Caloocan

UMABOT sa 1337 trainees ang nakapagtapos sa libreng livelihood training course ng Pamahalaang Lungsod ng Caloocan sa pamamagitan ng pagsisikap ng Public Employment Service Office (PESO) at Caloocan City Manpower Training Center (CCMTC).

Ang proyekto ay nagsisilbing isa sa maraming mga programa na nilalayong tulungan ang mga residente ng lungsod sa pamamagitan ng pagbibigay ng skills training sa pagsasanay sa iba’t ibang larangan, kabilang ang automative servicing, cosmetic science, at electrical installation and repair.

Binati naman ni Mayor Dale Gonzalo “Along” Malapitan ang Bagong batch ng CCMTC graduates.

“Congratulations sa CCTMC at sa lahat ng Batang Kankaloo na nagsumikap upang magkaroon ng pagkakataong palaguin pa ang kanilang kakayanan at masuportahan ang pangangailangan ng kanilang mga pamilya,” aniya.

“Hiling ko na mapakinabangan at magamit niyo ang lahat ng mga karagdagang kaalaman at karanasan na natutunan ninyo upang patuloy na mapalapit sa inyong mga pinansyal na hangarin,” dagdag niya.

Muli ring pinagtibay ng lungsod ang paninindigan ng administrasyon nito na palaging unahin ang pagbibigay ng matatag na trabaho at mga programang pangkabuhayan upang matiyak ng mga residente ang kinabukasan ng kanilang pamilya.

“Asahan niyo po ang walang patid na suporta at pagsisikap ng ating pamahalaang lungsod upang bumuo ng mga programa para sa kabuhayan at trabaho ng mga mamamayan upang mas mapaunlad ng pamumuhay ng bawat Batang Kankaloo,” sabi ng alkalde. (Richard Mesa)