Hindi na kasi binabanggit ang pangalan sa mga campaign rally… PCO Usec.Castro, clueless kung ano ang magiging plano ni PBBM sa kanyang kapatid na si Imee Marcos  

CLUELESS si Presidential Communications Office Undersecretary at Palace Press Officer Claire Castro kung ano ang magiging plano ni Pangulong Ferdinand Marcos Jr. sa kanyang kapatid na si Senador Imee Marcos na orihinal na kasama sa 12 senatorial bet sa ilalim ng partidong Alyansa Para sa Bagong Pilipinas.

Sinabi ni Castro sa press briefing sa Malakanyang na mas magandang malaman ang detalye nito mula kay Alyansa campaign manager at Navotas Congressman Toby Tiangco.

At nang tanungin kung may pagkakataon na nag-usap na ang magkapatid na Marcos, sinabi ni Castro na “Ayon din po kay Senator Imee ay hindi pa po siya nakikipag-usap kay Pangulo. So, as of the moment, as of this time, as we speak, wala pa po tayong alam na nakapag-usap na po sila.”

Sa ulat, inamin ni Senador Imee Marcos na matagal na silang walang komunikasyon ng kanyang kapatid na si Pangulong Bongbong Marcos.

“Hindi na kami nag-uusap, matagal na,” sabi ng senadora.

Aniya, tanging sa mga pampublikong pagtitipon na lamang sila nagkakaroon ng pagkakataon na mag-usap.

“Maraming nakapaligid sa kanya na humaharang sa aming mag-usap,” paglilinaw pa ni Senador Imee.

Nilinaw din niyang wala siyang sama ng loob sa hindi pagbabanggit ni PBBM sa kanyang pangalan sa Alyansa rally sa Cavite kamakailan.

“Ayos lang sa akin. Wala namang problema doon. Okay lang dahil nakatutok ako sa pagsisiyasat ng pagkuha kay FPRRD sa Pilipinas patungong the Hague,” dagdag niya.

Sa kanyang talumpati kamakalawa, 11 na lamang ang binanggit ng Pangulo sa halip na 12 na bilang ng mga tumatakbong kandidato sa pagka-senador ng Alyansa. (Daris Jose)