JOMARI, suportado ang pag-aartista ni ANDRE pati na ang hilig sa car racing; gusto nila ni ABBY na magka-baby

SUPORTADO ni Konsehal Jomari Yllana ang anak nila ni Aiko Melendez na si Andre Yllana na ngayon ay isa ng contract star ng Viva Artists Agency at kasalukuyang napapanood sa rom-com series ng TV5 na Di Na Muli sa bida sina Julia Barretto, Marco Gallo at Marco Gumabao.

Kuwento nang muling tumatakbo bilang Konsehal ng 1^st District ng Paranaque para sa ikatlong termino, “interactive kami ni Andre. Nag-umpisa na siyang mag-pictorials, interviews at nagti-taping na rin para teleserye.

“Yung communication namin is all about, paggising niya sa umaga, tinuturuan ko siya about his preparations.  At bago siya matulog sa gabi, kung ano yun dapat homework niya.

“’Yung approach niya sa tamang oras pagdating sa set, para hindi siya nagagahol. Yung passion sa work, ‘yun kasi ang natutunan ko and I’m passing it on.

“So, every now and then, nagkukuwento si Andre na meron siyang taping at interview. Isang beses siya na ang nag-make up sa sarili niya para sa interview sa PEP.”

Aminado naman ang dating aktor, na hindi pa niya napapanood umarte si Andre sa ‘Di Na Muli, although nasusubaybayan naman niya mga highlights sa Instagram na pino-post ng anak at ng TV productions.

Alam din ni Jomari ang pinagdaraanan ng mga artista sa lock-in tapings at kasama na nga si Andre.

“Nagkukuwento sila ng lock-in taping nila, parang napakahirap talaga. Pambihira talaga ang situasyon, kasi ila-lock in sila before shooting or taping days.

“I think that’s the worse, yung quarantine time ang pinakamahirap para sa kanilang lahat  and a big big challenge.

“Kaya ang madalas kong tinatanong sa kanya, kung ano yun breakfast, lunch at dinner niya.  Pag nagsasawa na siya, pinadadalhan ko siya ng foods, para naman maiba at maging healthy pa rin.

“Kaya doon ako nag-focus, kasi yun ang kailangan ng bata.”

Tulad ni Jomari, minana ni Andre ang hilig nito sa kotse at car racing.

“Sumasali na rin siya sa drag racing events.  I actually, prepared a car for him, kasi naghahanda na siya.

“Meron kasi siyang karera na tinitingnan na baka puwede niyang salihan kung matutuloy yun event. Kami dalawa, we’re working on it together.

“Kaya kung sasalang siya sa doon sa karera, meron siyang kotseng prepared na puwede niyang gamitin.”

Samantala, aminado naman si Konsi Jomari sa napag-uusapan ng partner at ‘lucky charm’ niya na si Abby Viduya ang pagpapakasal dahil hindi na sila bumabata at iniisip din ang magiging future nila.

At siyempre, pangarap din nilang magkaroon ng sariling anak, “gusto talaga namin ng kids, magkaroon ng baby pa.

“Pero hindi namin alam kung kaya pa ng mga katawan namin.  Pero kung mabibigyan pa ng pagkakataon, yes, gusto talaga namin ni Abby,” pagtatapos pa ni Jomari na ngayon ang nasa puso’t-isipan ay ang paglilingkod sa kanyang nasasakupang distrito sa Paranaque.

(ROHN ROMULO)