Kaso ng COVID-19 sa Marso, 500 kada araw na lang

INAASAHAN ng OCTA Research Group na ma­kapagtatala na lamang ng 500 kaso ng COVID-19 kada araw pagsapit ng kalagitnaan ng buwan ng Marso.

Sinabi ni OCTA fellow Dr. Guido David na base ito sa kasalukuyang pababa na ‘trajectory’ ng mga bagong kaso kada araw. Nitong Linggo, nakapagtala na lamang ng 1,038 kaso sa bansa.

“We’re projecting na cases will either continue to decrease, although baka bumagal na ‘yung rate of decrease, or baka mag-plateau na rin siya,” ayon kay David.

“We are actually projecting na it will continue to decrease. Hopefully, down to around 500 cases per day sometimes March, siguro (maybe) by mid-March,” dagdag niya.

Samantala, iginiit ng DOH na na wala pa sa ‘endemic stage’ ang COVID-19 pandemic sa Pilipinas sa kabila ng pagla­lagay sa ilang lugar sa Alert Level 1.

Nilinaw ni Health Undersecretary Maria Rosario Vergeire na nasa proseso pa lang ang bansa sa pagtransisyon sa ‘new normal’.

Ibaba ang Alert Level 1 sa Metro Manila at iba pang lugar sa Marso 1 hanggang 15. Pero puwede pa itong maiakyat sa oras na tumaas muli ang mga kaso at ang hospital utilization rate.