Kinilala rin ang husay nina Dimples at Mon: NADINE at BARON, waging best actress at actor sa ‘39th Star Awards for Movies’

MATAGUMPAY na isinagawa sa prestiyosong Winford Hotel and Casino ang ’39th Star Awards for Movies’ last Sunday.

Kung sa mga nakaraang Star Awards ang Airtime Marketing ni Madam Tess Celestino ang producer pero dito sa 39th Star Awards for Movies ay mismong ang PMPC ang producer.

At dito ay muling napatunayan ng club na kayang-kaya rin namang mag-produce ng isang awards night.

Kahit hindi gaano ng bongga ang presentasyon, ay maituring na isang tagumpay ang katatapos na pagpaparangal para sa mga karapat-dapat na mga alagad ng sining na nagpakita ng kakaibang kahusayan sa aspeto ng pagganap at teknikal para sa pelikulang inilabas sa taong 2022.

Kasama pa rin sa binigyan ng parangal ay ang dalawang maituring na institusyon sa showbis na sina Roderick Paulate at Seiko producer Robbie Tan, na ginawaran ng Lifetime Achievement Awards.

Full force naman ang attendance ng mga nagsipagwagi ng 33 categories sa pangunguna nina Nadine Lustre (best actress), Baron Giesler (best actor), Dimples Romana (best supporting actress), Mon Confiado ( best supporting actor) at marami pang iba.

Buhay na buhay naman ang show dahil sa sıgla at very energetic na pagho-host ng tinaguriang primera kontrabida na si Ms. Gladys Reyes kasama sina Ara Mina at Sir Joey.

Siyempre kudos sa aming president na si Rodel Fernando na tinutukan nang husto ang production at paghahanap ng sponsors. At siyempre congratulations din PMPC sampu ng mga opisyales at miyembro ng samahan.

***

AS of this writing ay wala pa ring pahayag ang kampo ng dating aktres na si Neri Naig at asawa nitong si Chito Miranda hinggil sa napaulat na pagkaaresto diumano ng una para sa kasong paglabag sa kasong Republic Act (RA) 8799 Section 8, o may titulong “Registration of Brokers, Dealers, Salesmen and Associated Persons” ng Security of Exchange Commission o SEC.

Ito ay ayon sa scoop na tsika ng sikat na showbiz insider at showbiz-oriented game show host na si Ogie Diaz na inaresto raw ng mga awtoridad ang Kapamilya aktres.

Ayon pa sa latest showbiz vlog ni Ogie na mapapanood sa “Ogie Diaz Showbiz Update,” may nagpadala raw sa kanya ng impormasyong si Neri nga raw ay hinuli ng mga pulis ng Pasay City Pulis noong Sabado, Nobyembre 23, 2024.